各行各業大吹淡風，揸筆搵食嘅亦唔例外。八方噚日去王貽興本新書《素晴^．^日子》嘅發佈會，唔見王生，但就同幾位幫本書畫插畫嘅插畫師傾過，其中仲讀緊IVE數碼動畫及漫畫角色設計高級文憑嘅龔灃話，今次能夠從百多名同學中脫穎而出，為本書畫插畫，即使一幅畫閒閒哋要改十幾次，都冇諗過放棄。
市道唔好，今年好多畢業生都騰騰震，明年6月畢業嘅龔灃都話，香港創意工業市場始終比較細，唔排除會去內地發展。不過龔同學算係好正面，佢同八方講，希望啲公司精簡架構之後，每個員工負責嘅工作多啲，可以趁機會學多啲嘢喎；佢仲話做乜都冇所謂，「有得畫畫就得！」八方聽到，都唔知讚佢後生可畏，定話佢入世未深好。