肥仔聰揀車，要大架要闊落要白色，「我咁嘅身形，要享受駕駛樂趣就梗係先要坐得舒服啦。」肥仔聰話跑車免問喇，「嘩，試過架蓮花，上車慘過做瑜伽。」咁今日架Alphard中後排闊過我屋企張梳化，滿意啦？「中後排係好舒服，但係軚盤校到最高都頂頂哋喎。」買Alphard又點會自己揸？「你唔畀我請番個身形一樣嘅司機㗎？」
文：嘴嚼爺
攝影：譚盈傑
啱啱喺大陸拍完一套劇，嚟緊會導演套戲嘅肥仔聰話，喺香港多數自己揸車。11年牌揸咗9年車，由三菱Dino到兩代Harrier，有時去屋企附近買嘢都會坐小巴，但係搭地鐵就免問，「實冇位嘅，企喺度，你知我身形啦，啲女仔自己撞埋嚟仲反轉頭睥番我，好似話我揩油咁。」可能我靚仔，未試過。
第二怕，跑車，「蓮花啲跑車，我諗我上落一次都要出一身汗。」仲有Maserati，「試過有朋友借我試揸一兩日，Maserati喎，試吓型吓先。試咗一日，發覺馬力大，載住我起步都好爽好勁；第二大，大食，我入咗三百蚊油，揸唔到一日又要再入。我架Harrier都係$1.8一公里咋。」
孝順仔最緊要闊落
肥仔聰咁大件頭又鍾意白色車，筆者就搵嚟一架連胎軨都係白色嘅Alphard畀佢試吓，點知咁啱咁蹺原來肥仔聰正想換架二手Alphard，「我朋友有架03年Alphard放畀我，我都諗緊。」識嘆啦！「我諗住自己揸㗎。換架Alphard係為咗屋企啲老人家上落方便啲，我嗰架Harrier車身都幾高。」孝順仔更有換車藉口，「我想幫架Harrier換番四條19吋軨。嘿嘿，一舉兩得啫。」試過新款Alphard之後，「坐就真係無得彈㗎喇，開工仲正，整部電視駁多部遊戲機加多個雪櫃仔，直情可以當第二個屋企。而且個天窗又夠大，我好鍾意夏天開天窗吹吓風。」咁性能呢？你要做司機喎，「新款個加減波好順，轉波拖波都唔會有突兀感，不過7人車都係有個通病，就係個車身有少少『浪浪』哋。𠵱家坐咗5個人都仲可以踩得幾快，算幾好力。馬力都好緊要呀，夠力爬頭好緊要，我第一架車第一日就炒咗塊側鏡，就係因為過過吓架巴士唔夠力。」
星爺有架Corona
肥仔聰揸過兩代Harrier，𠵱家又話換Alphard，都幾支持Toyota，「佢啲車又真係好襟用，我架Harrier揸咗咁耐都好少壞。」原來唔只搞笑天份被星爺發掘，揀車都有被佢影響少少，「佢有架Corona㗎，95年買落用到前排先唔要，證明Toyota啲車真係幾靠得住。而且佢啲車二手價跌到某個位就會停，放出去都唔會點蝕。」星爺原來咁長情，不過我最有興趣係史提芬周幾時再開新戲同肥仔聰搞吓笑都好吖，「近排都未有合作機會，佢都未開戲。我唔可以淨係等佢開戲先開工，我好大食，哈哈。」幾錢一公里？OK，爛Gag唔使笑。
ToyotaAlphard350
引擎：3,456ccV6
馬力：280ps/6,200rpm
扭力：35.1kgm/4,700rpm
傳動：6前速半自動波箱，前驅
售價：$379,000起
查詢：富利堡（23330747）
