英超聖誕例牌開快車，今期偏唔推介呢個聯賽，轉玩澳職。大家有睇星爺套《功夫》㗎呵？元秋揸住個大鐘發獅吼功，就連火雲邪神都要彈開幾丈遠。嚟緊周日有場澳職，我貼昆士蘭獅吼一樣識獅吼功，主場殺退唔識飛嘅威靈頓鳳凰。
聖誕只休一日全力備戰
昆士蘭獅吼暫排聯賽次席，雖然多打榜首阿德萊德聯一場，但其實只係少一分；全體隊員都信心爆棚，認為季尾可壓過阿德萊德聯捧走聯賽冠軍。有信心的確係好事，最重要班球員一啲都唔懶，就算家陣係聖誕節，佢哋淨係放咗25號一日假咁大把，放完即刻操練備戰星期日場波，好積極喎！起碼唔似其他球會，放假搞到班球員玩創晒個心吖。
串普利茅夫「客勝」
睇往績，似乎威靈頓鳳凰好怕「獅吼功」，除咗近兩次到訪獅吼嘅辛高普球場全輸外，就連今年10月尾，主場亦都輸過0:1，完全係格食格。
門將柏斯頓及守將薛蒙特雖然係就係復出，不過暫入10個聯賽入球嘅首席射手史美斯，據聞有傷在身，要通過臨場檢驗先知打唔打到，咁就經已死火啦，中場雲斯利亞又因膝傷收「咧」，作客點睇都惡唔出樣。
昆士蘭獅吼就唔同喇，射手沙治奧雲廸克近期腳風大順，對上4場入咗3球；中場大腦尼高斯又傷癒周中經已復操，再加埋前登地聯中場查理米拿做串連，相信要爭主場3連勝唔難，1.72倍主W放心出擊。
配腳就斗膽踩入蘋果波神地盤，要個英冠冷門，博普利茅夫作客卡廸夫城不敗開「客勝」。卡廸夫城個勢係唔錯，衰在啱啱喺BoxingDay作客硬撼完雷丁，肯定元氣大傷；借將前鋒祖柏似乎又唔係好想留喺英冠發展，我博卡廸夫城呢場要回氣。普利茅夫射手科龍傷癒復出，有力偷雞。
畢傑
周末早飛超級重心
星期日7
阿爾克馬爾細（2）
荷甲榜首阿爾克馬爾近8場賽事僅失一球，近季迎奈梅亨亦多保清白身，大細中位數定2.5球，取2倍「細」。
星期日16
伯明翰勝（待定）
伯明翰反彈能力強，今季未嘗連續兩場主場失分，菲臘斯腳風順可續信；史雲斯欠贏波本錢，主W值重鎚。
星期日31
米禾爾勝[-1]（待定）
米禾爾主場成績與李斯特城並列英甲首位，伊奧維則作客入球能力極弱，主隊贏兩球或以上唔難，又夠分頭。
難啃早餐
星期日5
泰國勝[-1]（3.8）
越南首回合技術性擊倒泰國，今返主場在領先2:1下，更可睇定嚟食，泰國失主場還要讓波，不值博。
〈早飛倉〉
主菜：星期日1昆士蘭獅吼勝（1.72）@1,700
渾水摸魚過關：星期日5越南勝[+1]（1.75）x星期日7阿爾克馬爾細（2）x星期日18普利茅夫勝[+1]（待定）3x1@300
今日早餐價錢：-$2,000
上日賺蝕：（未計周四成績）
早飛倉結餘：$97,010
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。