政府成日叫人終身學習，城大前校長張信剛就認真聽話，雖然年屆六十八，但好學精神認真可嘉。精通中、英、法文嘅佢，舊年退下校長一職後就長留北京大學同清華大學講學，可能見學生哥見得多，決定拎番起本書繼續學習，揀咗讀較冷門嘅阿拉伯文，向難度挑戰。
張信剛喺港台節目度話，同一班年紀比自己仔女仲要細嘅同學一齊返學，感覺都幾過癮，但就坦白承認年事已高，讀書一定唔夠啲後生仔嚟。張信剛又話，跟同學同老師完全冇代溝，而且仲好享受身為長者享有嘅優待，佢冇講係咪啲同學讓座畀佢，抑或去飯堂買飯唔使佢排隊，但以張信剛退休校長嘅地位，唔只後生仔女，相信好多人都會畀面。