奧巴馬的型男赤膊照片一出街，香港男人受難開始。他們的準（世事難如倪周戀，未必人人會成為）另一半好不哀怨，對住六塊腹肌的奧巴馬肖像恨鐵不成鋼地浩歎，人家小奧行年四十七，從未聽聞中年危機前危機後地卸膊。「係咯，得閒去健身啦，搞埋咁多唔等使，又哭又上吊的，醜態百出。」師奶都睇唔過眼，香港中女更加覺得，男方四字出頭搞搞震冇幫襯，點解唔學吓奧巴馬，不是高攀做總統，只係唔該你，將無聊的出醜機會減省，把旺盛但又不足以滿足到女伴的那份「無窮」精力，去健身院鍛煉，腰圍減一吋得一吋。「可惜香港中男都很out，有奧巴馬的真實年齡但有克林頓的實際體型。」市況勝於雄辯，「奧克同體」的中男，周街都係。「政界更加眼寃，人家選總統都能抽時間操fit，香港那些政治人，肯定是政治飯吃得太飽，得閒只會trymybreast而懶去操練胸肌。」
Well，也許本地政壇奧巴馬至驚人家挑釁地問，你個係咪假波。男人老狗，加上自我感覺中年危機，斷定不會還拖反問：唔信我堅料的話，夠膽摸吓呀笨。奧巴馬fit到漏油恨死隔籬，肥矮醜男最希望幾天後，有人揭發那副精壯胴體原來是經電腦執生改造過的纖體合成偽照。