【本報訊】口裏說中梵關係他無從置喙，事實他是教宗在中國問題上最信任的顧問，日後主力了解國內教會發展，向教宗滙報分析。卸任在即，陳日君不忘炮轟國內天主教愛國會慶祝自選自聖主教50年，「我真係唔知有乜值得出嚟慶祝，唔通係強迫人哋做啲違反良心嘅嘢？」他期望中國人民不但享受經濟開放的成果，亦可以享有真正的宗教自由。
陳獲教廷重視
陳日君昨日接受傳媒訪問時表示，中梵關係屬外交層次，他個人無法插手，「大家都有誤會，我自己係理唔到嘅，嗰啲係上邊外交嘅嘢，好似關心國內教會嘅嘢，嗰方面我可以出啲力。」
中梵關係最大障礙，是內地官方教會一直堅持自選自聖主教，不接受梵蒂岡的任命，令教廷極為不滿，曾發出自科絕罰的聲明，故陳日君對於國內愛國會近日慶祝自選自聖甚為反感，「呢個係50年前發生嘅事，後來又發生好幾次，教宗都好諒解，因當時環境逼住。後來自選自聖佢哋都覺得唔妥，就叫教宗寬恕，咁𠵱家又攞返出嚟慶祝？」
陳日君現時為教廷中國小組成員之一，又擔任多個教廷委員會的委員；今年復活節，教宗把復活節拜苦路小冊的撰寫工作交予陳，整個禮儀以中國教會為焦點，是教宗首次把拜苦路禮儀「外判」，可見陳受重用的程度。
愛國會副主席劉柏年被問及陳日君退休能否幫助中梵關係時稱，主要視乎陳日君的態度有否改變。