平安夜煲呔大手筆派禮物，一次過宣佈委任廿幾個人，分別成為旅發局、警監會同廉署幾個諮詢委員會新成員。各大黨派議員、前高官、政壇新秀包羅萬有，連無綫總經理陳志雲都有份，算係親疏無別啩。
志雲大師入旅發局
志雲大師同白鴿黨單仲偕，同時獲委任入旅發局，唔知係咪煲呔睇過志雲大師帶隊拍攝嘅《冰天動地》，認為佢精於做導遊，所以搵佢入旅發局。
旅行社協會主席胡兆英則指搵陳志雲啱數，事關旅發局日後搵TVB藝員幫手宣傳，相信無綫唔會托手踭，八方認為志雲大師親自上陣機會更大。旅遊業議員謝偉俊則指委任陳志雲入旅發局，可能係角色錯配。
警監會方面，兩位立法會議員林大輝、石禮謙獲委為副主席，另有六位新委員，分別係陳嘉敏、張達明、張仁良、方敏生、吳克儉同彭耀佳。
廉政公署貪污問題諮詢委員會、社區關係市民諮詢委員會、防止貪污諮詢委員會、審查貪污舉報諮詢委員會，以及廉署事宜投訴委員會亦有新面孔，三十會嘅李律仁係其一，「媽打」李麗娟都有份，大律師公會主席袁國強榜上有名，退休多年嘅施祖祥都出山，政壇老將梁智鴻也獲委任，唔通香港真係咁缺人做公職？上述新任命由明年1月1號起生效。