英超最富貴、季初最令人期待嘅曼城，經過近半個球季後，表現如何，大家心中有數。佢哋唔同阿仙奴，大家根本對兵工廠無期望，所以雲格只會自行劈炮，唔會被炒魷；現排尾3既曼城領隊「老麥」（麥克）曉士（MarkHughes）應炒但仍可過快樂聖誕，但另一位「老麥」麥阿里士打（GaryMcAllister），卻慘吃列斯聯無情雞。
無論經濟順逆，近年歐洲球圈嘅班主老闆唔啱就要炒，最多補水畀你，懶理你之前有乜豐功偉績。老細想炒人，原因係炒一個領隊可能救番隊波，做嘅工夫少，但實際效益可以放到好大，唔使諗，必做！好似新特蘭炒咗「大花筒」、但做唔到嘢嘅堅尼，sofarsogood。
麥阿里士打有情有義
不過，近期令我最失望，係見到季初睇好可以升班嘅英甲列斯聯，剛在聖誕期間炒了名望甚高、90年代初為該會贏得最後一個英甲冠軍（91-92，翌季英超創立）嘅蘇格蘭中場悍將麥阿里士打。較後生嘅球迷，也會對他在球員生涯末期，為利物浦在00-01及01-02年球季，打入英超聯三甲及捧過歐洲足協盃、歐洲超級盃及英聯賽盃記憶猶新。
人稱「老麥」嘅麥阿里士打，之後在高雲地利掛靴及擔任領隊；但有情有義嘅佢，因當年要全力照顧患乳癌嘅妻子離職，到今年初才接任列斯聯領隊，誓要帶領這支同利物浦一樣，在踏入千禧年曾風光一時，打入歐聯4強後因財困輾轉降落甲組嘅褪色勁旅回彈。
今季這支青春班表現可人，一直企穩前3，來季回升英冠機會高；但上月起傷兵漸多，加上射球機器碧福特重創，球會最近錄得5連敗，距榜首李斯特城15分（兩軍明日對碰），結果球會不念舊情，派大信封畀老麥，之後起用英冠黑池領隊加利臣掌兵符，圖盡快扭轉頹勢。
曉士要把握最後機會
冇錢擴軍，但輸幾場就要走，世態炎涼，不分青紅皂白。曉士看到另一位「老麥」嘅下場，實在應該好好反省，把握最後機會振作。金融風暴下，由上至下為保住份工各出奇謀，但香港高官叫人食多碗雲吞麵，或者入馬場頒獎前抽時間走去旺角，睇吓差人點樣部署捉高空擲物狂徒；實務做唔好，剩係攪啲小動作，你估阿爺係儍仔咩。古靈精怪，用我哋中產嘅血汗錢，請所謂公關高手、政治助理、問責局長，架床叠屋，信特區政府救世，嘥氣！
文：蘋果波神