聖誕節唔一定要見聖誕老人先有氣氛，嚟自澳洲嘅74歲特技老人CliveJohnHarrison就喺佳節大玩高難度動作娛賓，包括喺離地50呎高空，冇任何安全設施下表演單槓、吊環同空中飛人。八方噚日喺商場睇Clive伯伯表演，現場觀眾個個都睇到目瞪口呆O晒嘴。
唔用安全設施表演
雖然年屆74，但Clive仍然好fit，表演完都唔見氣羅氣喘。佢同八方講，6歲開始練高空平衡，高空踏鋼線對佢嚟講係easyjob，所以要搞搞新意思，玩吓高空單槓、吊環咁，仲話唔用安全設施嘅高空表演，先可以吸引到觀眾掌聲。
不過，高手都有失手嘅時候，Clive話好耐之前試過失手一次，成個人直飛落地，好彩只係胸口受傷，冇乜大礙，但呢次受傷反而令佢之後更加小心，每次表演都步步為營。Clive話，仲未諗過退休，原因係想繼續聽到觀眾嘅歡呼聲。呢啲咪叫做敬業樂業囉，年輕人真係要好好學習。想睇Clive表演嘅市民，今日可以去元朗廣場一睹佢嘅風采。