退休賓架R每年請吃午餐一次，每次一定係到五星酒店，時間係聖誕之前，一來搵佢昔年當紅之時嘅舊拍檔、舊同事一齊聚舊，二來多謝各人每年經常輪流約佢吃飯，等佢不愁寂寞。聖誕係溫馨時刻，一班老朋友坐埋一齊，月旦時事，一樂也！
大家冇遠遊，食完之後就分別過澳門住兩三晚，到舊佛笑樓食番餐正嘅，住酒店呢，賓架R話永利最冇得彈，不作他選。可惜吖，左丁山一早冇預備，唔能夠話行就行跟埋去澳門。賓架R今年揀嘅餐廳，不在五星酒店，而是在五星酒店隔籬，叫做Domani，佢話係意大利文，即係明天咁解，地中海沿岸人民十分樂天，相信永遠有明天，今日之事可以明天做，食餐飯可以食到明天凌晨，無拘無束，毋須限時限刻。
不過呢度係香港呢，食午餐唔可以食咁耐嘅噃；點知我哋成班人食到二時十五分，呢間意大利餐廳內仍然有九成上座率，好多人客仲未走。餐飲M話：「此乃高檔餐廳之跡象也，呢間餐廳之食客唔使趕住下午上班！」但係食到兩點四十五分，嘆到伯爵茶之際，手機響起，聽鈴聲就知道係老婆打嚟，佢在電話講：「乜食餐飯食咁耐㗎，打電話去公司都搵唔到你！」嗱嗱，邊度可以學地中海人民咁他條呢，急忙起身鬆人。香港人係要將明天之事今天做完嘅。
既係賓架R請客，大家唔多客氣，左丁山自己食頭盤牛仔肉，飲南瓜龍蝦湯，主菜食法國燒乳鴿，加埋好似要七百元，高檔餐廳食午餐，差唔多啦，setlunch連加一就盛惠五百。至於甜品，賓架R代我哋叫咗一款濃朱古力溝凍椰子碎，椰子碎在下，朱古力在上，撈勻嚟食，果然味道極佳，以前未食過，賓架R話此乃這間Domani特色甜品，人人讚好咁話。好就好嘞，怕甜怕熱量過多之人或者會唔敢食或者最多食兩茶匙，唔敢食晒成杯。寫寫吓，幾乎唔記得寫Domani喺邊度。呢間新餐廳開幕未久，位於太古廣場第一期寫字樓旁邊（西面），餐廳乃新建築物，一層高，玻璃外就係繁忙金鐘中環景，餐廳外係花園，連接的士站與星巴克。