近期看過一篇關於余文樂的報道，訪問內容不怎記得，但最記得開頭四隻字「打入潮界」，頓時問號升起兼諗此話何解？再諗真一下，行入第七個年頭的余文樂對於觀眾來說已不陌生，為何現時才說他打入潮界？是以前的他不「潮」還是現在突然「潮」？既然有欄目在此，就為大家邀請公認潮人余文樂坐一坐，談一談吧。
記者︰吳美美
攝影︰梁細權
Makeup︰JennyTziong
Hair︰BenYeung
Location︰CoffeeBook（25595199）
第一次到巴黎時裝周見聞
巴黎時裝周是時裝界盛事之一，既然是潮人，到法蘭西一遊都在所難免，咁蹺，今年7月時分，余文樂與最強盲公竹黃偉文結伴暢遊巴黎時裝周，本身已極愛巴黎的余文樂，今次一遊有何見聞︰「今次係正式第一次去，每次都擦身而過，有陣時又唔得閒去，到得閒又覺得好嘥時間，怕會好忙好辛苦，好唔想將興趣變成苦差，但又想去睇，好掙扎，但今次多個理由，要去倫敦探妹妹，所以就成行。其實去完都覺得好辛苦，令我知道點解Buyer們咁憎巴黎，年年去幾次，真係幾辛苦，因為其實fashionweek嘅巴黎幾乞人憎，幾唔巴黎，同平時嘅節奏好唔同，平時就好慢好慢，一到fashionweek就好似香港做嘢咁係咁衝，好多人好多車，如果一開始見到咁嘅巴黎我都唔會鍾意。如果自己個人喜愛就鍾意玲姐（川久保玲）個show啦，本身都好鍾意玲姐嘅設計，今次去又碰到面又認識咗，又傾過偈佢又好好心情，個過程都幾開心。」
最唔厭同最討厭
明顯地，CdG成為了明星們最愛牌子的坐亞望冠位置，連余文樂都不能倖免︰「其實我諗二十歲左近，自己都唔會太熱衷川久保玲嘅嘢，但係當你慢慢對時裝有興趣，相信好多男仔最後尾都會鍾意CommedesGarcons，無論fitting、cutting，你會越來越鍾意佢嘅material，大家有無見過一個品牌設計嘅恤衫唔會過時，玲姐嘅設計就得，因為佢唔單止係fashion，仲係一種classic，即係如果你叫我唔要以前好鍾意嘅嘢都得，但我都會留番玲姐嘅產品。」聽落，CdG成為他心目中最愛品牌是無走雞的了，至於item選擇又如何？因為每人總有重複地買某種設計、顏色、款式的東西︰「我會鍾意買好多白色嘅鞋，classic款嘅鞋，但就無定係邊款牌子，總之見到白色，除皮鞋外，但多數係sneakers。好多時，我一見唔係白色嘅鞋就會覺得唔靚，所以屋企就算有好多對，但最後都唔理繼續買，同埋有陣時見到對鞋唔夠白，就會拎對新嘅白色鞋嚟着，有陣時諗唔到着乜鞋，白色鞋就一定覺得無事。」總之一句到尾CdG、白色、CdG、白色……當然有最愛亦有最怕，登！登！登！係咩呢︰「Colourful我一定唔會試，即係好似B仔（BernhardWillhelm）我一定着唔到，試嘅心都無，有想像過，想像過着咗上身一定會死梗，真係過唔到自己嗰關。」
曾經Fashionicon——木村拓哉
變成潮人前，總係時裝路上有一番經歷，開始時期往往是中學，聽聽余文樂細說當年︰「當然都有迷戀過名牌，記得儲Bapestar儲到癡咗線，而且，都有買日本雜誌睇吓點襯衫，十幾歲都已經買嚟睇，記得好初期時買《Boom》、《Men'sNon-no》，同同學夾份一人二十蚊，擺學校lockerkeep住一齊輪流睇，一見到入面有靚嘢就去美華氏搵吓類似款式，記得木村拓哉着咗件格仔衫好靚又係去搵差唔多樣，總之有段時期去美華氏搵Levis501，美芝搵格仔恤衫啦！」大家過去總有追捧過明星偶像，佢哋點自己就會跟，至於余文樂，佢話︰「細個就一定木村，佢對RedWing真係害死人㗎！Nigo都係，但𠵱家真係無。因為細個唔識就會搵人模仿，但到一個地步就有自己見解，其實呢個都係一個過程，亦都好正常。」
OwnStyleOwnLabel
身邊朋友街坊親戚，好鍾意上外國網站睇吓Snapshot，參考其他人點襯點着，但情況逐漸惡化，開始有人朝早一起身就上網睇有關網站，見到靚就照抄，好恐怖︰「我從來唔會咁樣做，因為真係每人都會有自己style，譬如玲姐個髮型，呢一世都係咁，就係佢嘅label，Wyman佢着好多唔同嘅衫，但係你會認得佢個skinhead，着衫係要注意個潮流，但最終都係着番你開始覺得啱自己嘅一套，我真係因為覺得自己鍾意着得好睇，咁咪着自己嗰套囉，咁如果你好肥，但又想着DiorHomme，咁都無辦法，都唔啱身，唔啱就係唔啱，除非好extreme地肯減肥去着嘅咁咪ok囉，但我又唔會咁做。」既然咁有自己一套，肯定就有自己一套着衫宗旨︰「不斷去着自己鍾意嘅嘢，不停咁着就會變成自己style。譬如自己成日着黑色嘅，等人一見到黑色就諗起係余文樂。當然，要問一問當事人點樣睇「打入潮界」呢句近期放喺自己身上嘅標語︰「無特別諗個意思係褒定貶，無得去考究，唔需要睇得太深。」答得言簡意精，型！
ShawnYu's飛佛
Moncler×JunyaWatanabe
「呢款比較少有，自己都未見過，質地好似地毯咁，最近喺巴黎時見到，嗰陣天氣又好凍就買咗。」
NikeSportswear
「剛剛最新收到的產品，自己都比較鍾情於黑色同functional褸款。」
Visvim牛仔褲
「褲上嘅細節位，係按照穿者長期穿着時所造成的效果翻造而成。」
JeanProuvedesignerbook
「內裏詳細記載自己一位好鍾意的設計師，JeanProuve過去曾經設計作品嘅資料同圖片，包括曾經用過嘅色板同草稿。」
Macbook
「基本上是每日都會用到的東西。」
後記
訪問前做資料搜集，瀏覽余文樂的blog望望，見到佢講愛古董錶，訪問時問問收藏情況如何時︰「好大穫，唔好講啦，哈……，暫時都係幾隻啦，儲古董錶可以第時留番俾個仔用。」當時他的反應係尷尬而笑，似乎古董錶價錢應該都幾令人卻步。另外，作為大眾潮人，梗要講自己心水品牌等人參詳一下︰「Casualwear就日本多，suit就歐洲牌子多，最fit、從來唔需要改嘅時裝係DiorHomme，而且自己都好怕去改衫，Visvim、CdG、JunyaWatanabe、N.Hoolywood等。」等住做潮人嘅某某，資料夠唔夠？
