喺立法會裏面，話社民連係最火爆嘅政黨相信冇乜人異議，好似大嚿陳偉業咁，平時成日嚴辭狠批高官，但噚日係普天同慶嘅聖誕日，佢出席一個幫四川地震災民籌款嘅嘉年華時，就同民政事務局副局長許曉暉同旅遊事務專員方舜文兩位女士好好傾，氣氛出奇融洽。
原來大嚿本身都算係今次籌款活動嘅半個搞手，作為主人家當然要禮貌接待蒞臨主禮嘅嘉賓啦。大嚿帶住許副局同方專員參觀攤位時，又親身示範戴上即場義賣嘅京劇臉譜，又送上四川特產嘅熊貓公仔，十分殷勤。早排成班副局同政助出嚟報佳音，許曉暉都有份，噚日又要出席活動，佢話佢同八方一樣，聖誕都照樣要開工喎。