煲碟一向係節日抵玩節目！嚿幾水明碼實價，唔怕俾人屈、唔使逼、起碼有位坐；返屋企煮完飯仔，瞓住睇又得，邊飲、邊食、邊依泣亦得，暖笠笠理鬼你地鐵巴士通唔通宵接我返屋企。今日聖誕節搵嚟愛情片導演馬偉豪同「森美小兒歌劇團」導演編劇火火推介應節佳碟，5隻推介DVD得兩隻愛情片，另外60%係咩？唔會係《Homealone》啩！
aboutme
姓名：馬偉豪
職業：導演
最難忘聖誕：在模糊記憶中，記得第一次同女朋友過平安夜睇嘅戲係《聖誕奇遇結良緣》。
今年要點過：已經約好晒同朋友開Party，想靜靜坐低睇戲？相信都要到26、27號。
最渴望聖誕：當然唔係煲人哋嘅片！而係自己有戲上，等觀眾嚟睇我拍嘅戲啦！
好碟推介
《我和尋回犬的十個約定》$100
《索女喪屍機關槍》$80
《馬偉豪：結婚DVD》（無得賣！）
《地下鐵》$58
《90男歡女愛》$100
DVDPro：23326326
馬偉豪強迫分享愛
嚟緊有部同火火合導嘅《愛得起》食住個情人節上畫，拍愛情片最耍家嘅馬偉豪覺得唔同節日要睇唔同戲：「前兩年冇得揀，好似過年要睇《門徒》就怪怪哋。聖誕會想睇開心、浪漫嘢；暑假就想睇啲少女喺沙灘跑嚟跑去，熱辣辣開心鬼嗰啲。」「我好鍾意聖誕，我嗰個年代會去舞會，凍凍哋都有啲回憶，有藉口俾啲青年男女聚埋……我記得自己有好多個聖誕節都係拍拖睇戲，難忘嘢冇乜，淨係記得《聖誕奇遇結良緣》，個戲名都擺明叫你約女友去睇，嗰陣好似連租帶都未興，梗係要入戲院睇！」
血腥Cult片反高潮
不過聖誕夜煲碟推介，就唔係百分百浪漫愛情：「新片就《我和尋回犬的十個約定》，呢套我太太前幾日趁我做緊嘢睇，我見到佢睇到好Warm、好感動。」之後輪到自私一點，仲未係愛情片：「呢幾年口味有啲轉，雖然自己都係繼續拍啲溫馨愛情嘢……唔！《索女喪屍機關槍》，呢套就深夜自己Enjoy嘅，血腥少少，畀一個反高潮自己。做人唔可以咁單向，唔係永遠都溫馨甜蜜嘅，最尾橫掃喪屍一幕令人非常興奮。不過我太太應該會睇到瞓着。」
自家結婚DVD翻煲
第三隻候選碟，嘥氣！街度冇得賣嘅：「我今年自己結婚時拍嘅DVD，親友嚟到就迫佢睇，迫佢哋分享我嘅愛，哈哈！」終於輪到愛情片：「好無趣地，我揀番自己導演套《地下鐵》，雖然拍嘅時候冇預聖誕節上畫，但裏頭有天使有聖誕佈置，又有新年除夕大倒數，都略有聖誕氣氛；最後呢套經典，我買咗之後都未開封，因為已經睇過太多次──《90男歡女愛》，經典愛情片，最尾嗰個道歉連示愛場面好好，男主角戚起個死人嘴似笑非笑，想喊又無喊嗰個表情，女仔睇到應該幾冧。」
《結婚DVD》
馬偉豪分享愛之選，讀者冇得睇？「係！應該係冇得睇嘅。」
火火DVD冧女攻略
船頭尺示愛
火火好體貼咁為不同類型男友安排聖誕夜DVD，有進取、智取等功能，亦同時有可以安慰單身族：「《秋天的童話》，港產愛情經典，因為Ending係講大家鍾意對方，但又從來無表達過，所以就錯失咗一段姻緣。如果睇到臨尾個男仔同女仔講：『如果我哋大家都唔表達呢，就好嘥，浪費咗大家嘅愛。』嘩！浪漫死啦，未到手嘅我覺得一定要呢隻！如果睇完、講埋古仔！佢都仲要落街返屋企，咁我諗你以後都唔使搵佢！」
孖「狗」扮嘢玩台型
實戰型之後，有For扮晒嘢一群：「泰國愛情片《大狗民》，扮嘢嘅愛情之選。套戲講個鄉下仔去曼谷做嘢暗戀咗個女仔，美術做得好靚，所有畫面都好幻想化，好有型。
再唔係《落水狗》，有咩型得過聖誕叫個女仔同你返屋企睇Cult片？咁都應承你呢，個女仔都應該係等緊你做某啲嘢，可能上到屋企都唔需要播套戲喇。」
DryParty睇儍戲
單身嘅，麻甩群或中女群，開DryParty亦有碟可播：「《精裝追女仔》啱一班冇女朋友、要累埋喺一個Friend屋企玩鬥地主嘅麻甩仔，一路玩一路睇，笑一輪就過咗一晚。《新紮師妹》講一個唔係好靚儍更更嘅女仔最後都可以得到愛情，係女孩子嘅夢想：『我係個女主角就好喇。』8、9點自己播完一次，扭去無記隨時又播緊第二集㗎喇。」
火火真名李家榮，係話劇演員、導演、編劇，擔任過「森美小儀歌劇團」、《大煞風景》舞台劇嘅導演及編劇，亦導演過多個MTV：「時代點變都好，嗰幾日個人都特別感性啲，需要溫暖多啲，無男女朋友就寂寞啲啲。」
不同界別推介
（電視界）李思捷 《Wall-E》
「唔只小朋友，大人都啱睇嘅動畫，畫功好好，想像力豐富。滿足不同類型人士。」
《BATMAN黑夜之神》
「劇本畫面都好好，今年最Top嘅電影，睇好電影，唔使理咩節日氣氛。」
（DJ界）鄒凱光
《國產零零漆》
「開Party睇最開心，由頭笑到尾，由蠱惑的槍到睇鹹片攞子彈可以唔停咁笑幾十分鐘。」
《情書》
「唔使講啦，浪漫！最後一段，向住日出大嗌你好嗎我很好，真係好感人。」
（歌星界）江若琳
《真的戀愛了》
「愛情故事好浪漫溫馨，而且都係大團圓結局，最啱拍拖男女睇。」
《魔幻王國：獅子女巫魔衣櫥》
「我自己好鍾意呢套戲，有大場面特技好勁，故事又好，啱一家大細睇。」