聖誕佳節，好多公司都會酌量津貼員工搞聖誕Party，喺普天同慶日子大家高興吓，有啲識做老細，更會私下夾多份錢，𠱁吓下屬開心。不過小小超李澤楷旗下8號仔電訊盈科，員工今年個聖誕Party卻俾人靜靜雞「撻」走，忽然冇咗，搞到好多人條氣好唔順。
取消50蚊派對津貼
電盈連同前身香港電訊，傳統上每年都會津貼各部門搞聖誕派對，按人頭計每個員工津貼50蚊，多除少補，部門主管通常會扲荷包畀多份，Party規模大小、形式好自由，由部門自行決定。電盈職員協會主席葉岳峰同八方講，呢50蚊開心錢，幾十年來從冇走雞，不過今年卻無聲無息消失咗。
據葉岳峰稱，公司冇正式通知員工取消呢50蚊津貼，似乎學足老董嗰味嘢，唔講等如不存在。佢指電盈約有一萬名員工，慳番呢條數，都只係使少約50萬元，少過一名中層員工年薪，唔夠出三個月糧畀年薪幾百萬元嘅高層。葉岳峰早前以工會主席身份向人事部查詢，又去信公司表示遺憾，有高層同佢講：「金融海嘯嘛，仲搞Party？」
葉岳峰話，員工唔係志在50蚊，而係覺得聖誕係一年一度大節，員工都希望開開心心玩番半日，50蚊津貼係公司對員工嘅心意，連幾十蚊都慳，一班手足都覺得公司冇乜人情味，就算可以自己夾錢開派對，都冇晒mood啦，所以噚日下晝，公司入面冷冷清清，唔知係咪大家無聲抗議。
電盈上半年純利有6.56億元，小小超今次為咗慳區區嗰50萬元，就令員工一年一度嘅Party冇咗，冇得擦餐飽事小，有損員工士氣事大。
員工擔心花紅縮水
有8號仔員工同八方呻，恐防一葉知秋，最擔心今次只係公司縮皮第一步，因為Party都慳番唔搞，下年度份花紅分分鐘大縮水，甚至凍過水，諗到呢度，今個聖誕真係唔多快樂。
電訊管理局啱啱同意電盈私有化計劃，葉岳峰話員工都好擔心公司會有大動作，唔知飯碗仲保得幾耐。電盈發言人表示，公司之前已表明暫時冇裁員計劃，至於50蚊派對津貼，係因應當前經濟環境，上上下下需要勒緊肚皮，所以取消資助員工搞Party。
mailto:[email protected]