寰宇電影公司舊年推出謝霆鋒、房祖名同余文樂合演嘅電影《男兒本色》，由於票房同口碑都唔錯，所以寰宇又玩噱頭，決定下年3月開拍35集嘅同名劇集。
不過今次電視版《男》劇同電影版完全唔同，故事背景係30年代嘅上海證券市場，男主角人選亦棄用偶像派，會由TVB三屆視帝羅嘉良同內地影帝劉燁主演。至於女主角方面，除咗內地女演員劉梓妍同王雅捷之外，仲有早前被指介入寰宇老闆林小明婚姻嘅江若琳。
慶幸新劇做奸角
噚日馮仁昭同嘉良傾開電話，嘉良承認將會接拍該劇，但佢只係客串演出，所以暫時未知會有幾多戲份，一切都要等劇本出咗先知。嘉良話都想同劉燁合作，不過今次可能有緣無份，佢話：「好似我哋都冇乜對手戲，但佢係好演員，我好欣賞佢演技。」
嘉良仲話最近忙緊拍攝無綫新劇《金錢誘罪》，噚日都要開工，好彩佢今次喺劇入面做衰人，令佢避過落水命運，事關佢次次開劇做親好人都會好黑，導演梗安排佢冬天落水，嘉良講笑咁話：「通常做好人都要上山下海，今次做反派就唔使去跳海啦！」