聖誕節係外遊好時機，唔少高官已經飛咗，明年至開工。但特區政府至少有幾個高層留守大本營，唔知係咪怕泰國包機事件期間無人駕駛嘅情況重演。身為特區領導人嘅煲呔自然唔敢走，留喺香港過聖誕。身為天主教徒嘅佢可能閉關度橋，諗吓點樣響應陳樞機呼籲「節儉」之餘，有乜消費以外嘅方法救市。
李少光唔敢離港
早排因為包機事件俾人抦嘅保安局局長李少光都唔敢離港。官場中人話，其實近幾年李局長大時大節都唔敢出埠，因為大吉利是講句，呢等大節好多港人外遊，過去又發生過外遊港人嘅大鑊意外，所以李少光通常都唔揀呢啲時候放假遊埠，方便有突發事件可以即時應變。點知世事無常，唔喺長假期發生嘅泰國封機場事件，卻令佢千年道行一朝喪。
同樣受包機事件拖累民望嘅唐唐由於有官場老手孫明揚署任佢個位，所以已經好放心咁，喺23號開始放假，一家大細去外地旅行。據聞唐唐辦公室同僚求神拜佛希望聖誕期間冇乜突發大事發生，就算有官場老手孫公鎮守都係咁話，事關𠵱家嘅時勢吓吓都講跨部門協調，好易燒到唐唐嗰瓣。
至於明年2月尾就要交預算案嘅鬍鬚曾，可能因為預計嚟緊一段時間都唔得閒，趁早喺聖誕到外地旅行，順道為預算案搵多啲靈感，佢個位就由財經事務及庫務局局長陳家強署任。
外遊局長亦有一大堆。早兩日先為明愛單嘢出嚟道歉嘅食物及衞生局局長周一嶽喺24號飛咗，31號先返。據聞周局長個寶貝女喺外國讀書，所以一放假就會外出探女，享受吓難得嘅家庭樂。環境局局長邱騰華都係官場嘅好好先生，23號同屋企人飛咗去日本，當係送畀屋企人嘅聖誕禮物。好打得嘅發展局局長林鄭月娥都有柔情一面，尤其對住個寶貝仔；今個禮拜初已經放假飛去英國探囝囝嘅林太，應該有個溫情洋溢嘅聖誕。
一班暑假忙完選舉嘅立法會議員都鳥獸散，去外地叉電。因雷曼事件時勢造英雄嘅民主黨甘乃威同太太飛去台灣二人世界，彌補之前冷落嬌妻嘅天大罪名。同樣跟進雷曼嘅民建聯李慧琼就帶囡囡去海南島陽光與海灘。啱啱做咗公民黨副主席嘅袋巾就罕有地唔去英國，事關阿囡返咗香港，今個聖誕終於可以留港過聖誕。
mailto:[email protected]