平安夜出街倒數，柴娃娃打成一片嗰種熱鬧感染力，實在值得死逼爛逼，不過香港地方淺窄，未到十點已經逼爆人流，想倒數就要早過警察封路前入場，戙喺條街呆等兩粒鐘都咪話唔悶。今日同你數港島區倒數熱點，Vangie、啤梨、Percy、狄易達、裕美同Toto殺入蘭桂坊教你玩小遊戲，用$100搞氣氛，大家點睇？
記者：許維雅
攝影：伍慶泉
鳴謝：JUSCO十元廣場（28921812）
買玩具等倒數
未去倒數熱點，一行人先去銅鑼灣JUSCO十元廣場掃貨，限額$100買10件玩具，抵食夾大件，以最好玩最消磨到時間為原則。六個嘩鬼入場，第一時間跑去玩具部，人人起勢揀貨，一時話公仔頭箍夠好笑，一時又話迷你網球拍夠過癮，件件都話買，每人拎幾件，搞到過晒額，整整吓仲發覺有啲貨唔止$10件。幾經辛苦篩選一輪，再衝去聖誕飾物架買聖誕帽同飾物，最後買咗總共10件，埋單$100，「我哋揀啲玩具，肯定好玩又夠氣氛呀。」講完，出發，浩浩蕩蕩殺入蘭桂坊。
達仔話要買木童笛同玩具棒球，最後兩樣都無買，作狀敲裕美兩下過完癮算數。
玩轉蘭桂坊
港島區倒數熱點，蘭桂坊絕對係No.1，雖然蘭桂坊唔少酒吧大嘆受金融海嘯影響，搞唔起甚麼大型聖誕慶祝活動，但各位愛飲酒倒數慶祝人士依然撐場。想夠聖誕氣氛，六人就推介去加州大廈旁邊棵巨型聖誕樹打躉，玩氣球、開小賭檔、跳舞等倒數，但求倒數前一刻同在場其他朋友打成一片推高氣氛。先前買咗10件玩具，實則玩得只有3件，唔算多人圍觀，勝在玩得好投入，尤其輪盤、氣球可以一大班人一齊玩，場面開心熱鬧。
難忘倒數
裕美
媽咪聖誕生日，有年同佢去嘉年華玩最開心。亦試過聖誕前夕分手，去尖沙嘴海旁見到人一對對，喊到甩肺。
Percy（范萱蔚）
我屋企係大家族，成班親朋戚友喺屋企搞Party倒數最開心。有年同朋友入屯門黃金海岸倒數，感覺好清靜好舒服。
狄易達
05年有品牌邀請我隊跳舞組合去海旁跳舞倒數，一齊玩得好開心。亦試過去蘭桂坊倒數，周圍啲人會投入啲興奮啲。
Vangie（鄧穎芝）
以前成日會約埋一大班朋友去海旁跳舞倒數。但有年有其他人埋嚟搞事，最後搞到要上差館做證人，嗰次最難忘。
啤梨
女朋友喺外國，每年聖誕先返香港，所以好興奮。有年喺多倫多過白色聖誕，以為好好玩，點知唔夠香港咁好氣氛。
Toto（區俊濤）
成班朋友到尖沙嘴海旁，逼吓逼吓玩噴雪，好享受一齊玩嗰種興奮。最難忘有年玩噴雪，俾警察叔叔捉住鬧咗好耐。
街訪心聲：感覺冷清咗
凌小姐：「可能會喺屋企過，如果選擇出街倒數，會去廣東道，多人氣氛好啲。」
陳小姐：「倒數點可以唔飲酒？蘭桂坊有啲酒吧可以帶埋狗仔入場，感覺幾特別。」
蘇先生與朋友：「舊年去皇后像廣場倒數，因為有人唱歌慶祝，今年感覺冷清啲。」
Ryan及Catherine：「如果決定出街玩，應該會去尖沙嘴美麗華嗰頭倒數。」
港島區倒數熱點
1.第四十三屆工展會：食鮑魚倒數
如果唔喜歡飲酒，想一嘗親子樂的話，不妨去工展會掟個Round。當晚，工展會將舉辦「同珍工展親子入廚善心迎聖誕」，有泳兒、楊崢陪你過聖誕，倒數前可以慢慢行街掃平貨，買件鮑魚邊食邊倒數夠晒特別。
日期及時間：12月24日 11:00am-1:00am
地點：維多利亞公園
查詢：34212012
門票：$10
2.香港繽紛冬日節：靜靜過最浪漫
兩口子怕嘈怕逼，搵棵30米高巨型閃爍聖誕樹陪你過聖誕就最浪漫不過，今年雖然無甚麼大型聖誕村，但一樣有詩歌團報佳音，配合埋附近商廈的聖誕燈飾，記住帶定相機拍攝醉人夜景。
日期及時間：12月24日3:00pm至1:00am
地點：中環皇后像廣場（香港文華東方酒店旁）
3.銅鑼灣行人專用區：最多電視
銅鑼灣行人專用區附近商場，今年無甚麼大型聖誕倒數活動，但作為最多人流嘅行人專用區，加上世貿中心又啱啱裝修完畢，岳高頭N咁多部電視，今晚估計實會轉播倒數節目，大家戙喺條街一齊嗌，都可以High啫。
4.時代廣場：慣性地標
時代廣場無任何慶祝活動，不過有大鐘同大電視，即使無活動一樣聚集到人自發倒數。地庫ChristmasGarden，開放時間會延遲至12:00mn畀大家影相，兼有聖誕老人陪倒數。
