現年28歲的張栢芝年初捲入淫照風暴，人氣和事業均直插谷底，她索性相夫教子，全力造人，栢芝媽和姑仔謝婷婷近日分別直認和暗示栢芝懷孕喜訊，穿上鬆身衫的栢芝前晚抱着囝囝Lucas陪霆鋒出席飯局，大晒溫馨，一向錫到栢芝燶的老爺謝賢更表示歡迎她為謝家添牛年寶寶。
零工作的張栢芝自年初捲入淫照風暴後，索性做全職主婦，除了全力出擊造人箍緊夫婿謝霆鋒外，更不時帶同已16個月大的兒子謝振軒（Lucas）狂黐奶奶狄波拉，長輩多番暗示要栢芝為謝家開枝散葉。最近更傳出栢芝已懷有兩個多月身孕，栢芝媽早前在訪問中更直認很開心再做外婆。
Lucas好奇眼睩睩
栢芝媽代女兒承認有孕後，一直深居簡出的栢芝，前晚約11時終於首度露面，她帶同Lucas到中環蘇豪的「水滸居」，出席謝霆鋒主演的電影《証人》慶功宴，同場還有張家輝和其他台前幕後工作人員。現場所見，栢芝抱着Lucas先行步出餐廳，霆鋒的男助手一直指着地下樓梯提醒她要小心，而栢芝的身形略胖，穿上鬆身衫和抱着Lucas的她，遮掩着微隆腹部，她還包着頸巾保暖，向來貪靚的她前晚腳上改穿Gucci平底鞋。
栢芝與Lucas箭步般登上保母車後，頭耷耷迴避鏡頭，相反一身紅色F1跑車look配冬菇頭的Lucas，卻對記者的鏡頭十分好奇和敏感，全程眼仔睩睩，殿後的霆鋒，臨上車前更向記者說：「聖誕快樂。」
據知，霆鋒和張家輝等相約吃飯為電影《証人》慶祝，煙癮很大的霆鋒中途冒風走到街外煲煙，他說：「同《証人》嘅台前幕後嚟食餐飯。」對於早前有報道指他受母親狄波拉唆擺，向外母栢芝媽閂水喉停家用？霆鋒笑了笑說：「報道呢啲嘢都好信，咁多年我唔會對呢啲嘢有任何反應。」張家輝則逗留至昨日凌晨1時半才離開，問他在席間可有與栢芝交流湊仔心得，他尷尬的說：「我嚟食飯咋！」
四哥：我都屬牛
就栢芝再度有孕向老爺謝賢（四哥）求證，他昨日在電話中說：「我唔知，我冇問，呢啲嘢梗係等佢嚟同老爺報告啦。」照推算栢芝的預產期大約是明年7月暑假，是個牛年寶寶，明年將屆72歲的四哥心情大靚的說：「咁咪好囉，我都屬牛。」
採訪、攝影：娛樂突發組、比華利