王貽興最近拍住吳君如喺商台開咪主持節目《嘩！嘩！嘩！打到嚟！》，君如日前爆佢同無綫冇約，據知王貽興同無綫仲有一年死約，有消息話佢傾續約時開太多條件，既要保持文人形象，又要保證自己有固定出鏡率等，無綫嫌佢煩，寧願同佢斬纜。
指電台自由度大
無綫製作資源總監樂易玲都承認決定放生王貽興，王貽興梗係走得快好世界，噚日佢喺電話度話：「我自己都想淡出，所以樂意喺和平氣氛下提早解約，𠵱家要有啲文件落實晒先可以同大家公佈。」對於有指佢續約要求多多，王貽興自辯：「以前未做過呢行，唔識開列簽約條件，𠵱家梗係識爭取自己應有嘅權益。」
談到09年大計，王貽興話想做好電台節目：「做電視只係不停背稿，但做電台節目，我可以有自己嘅創意空間，自由度大好多，鍾意講乜就講乜。」馮仁昭覺得王貽興咁有大志，好應該乘機挑戰自稱做過全港最受歡迎電台節目嘅倪震！