唔好以為我求大俠一把年紀冇童真，今日平安夜，不期然都會諗起聖誕故事；聖誕老人每年都會將禮物送畀乖嘅小朋友；英超領隊曉士出名爛仔，不過聖誕前都收到阿布扎比老細嘅禮物，就係4,000萬鎊（約4.6億港元）本票一張，畀佢1月轉會市場買人。
老細縮皮撥4.6億擴軍
咦！阿布扎比老細以前唔係好財大氣粗嘅咩，傳聞出手買人講親都億億聲，目標唔係卡卡、美斯，就係保方、泰利，好似想幫曼城變做世界明星隊咁誇，睇嚟全球油價回落同金融海嘯，對中東富豪都有影響；不過講真，曉士帶隊波打得咁差，跌到英超尾3，唔使炒魷仲有錢買人，真係要多謝呢位聖誕老人嘞！
「平價」斟高路托尼比拿美
曉士子彈有限，但曼城前中後3線都要執，曉士惟有考慮次一等人選啦；曉士忍夠成日發夢嘅李察鄧尼，希望首先改善中路防守，想以1,000萬鎊（約1.1億港元）喺阿仙奴撬走科特廸瓦中堅高路托尼；曼城消息人士仲話，高路托尼係曉士第一優先收購目標，只係等阿仙奴回覆，又話高路托尼已經失去雲格寵信，玩埋離間計；另外，車路士左閘布歷治、維拉利爾
防中辛拿同門將廸亞高洛廸古斯，都
係曉士目標。
前線方面，為咗解決冇羅賓奴就冇波入嘅問題，曉士就想搵番一對踢過布力般嘅前鋒辛達告魯斯同比拿美，貪布力般時期教過，聽教聽話；不過一個辛達告魯斯，布力般已經開價2,000萬鎊（約2.2億港元），比拿美呢排又打番起，韋斯咸又點會平放，曉士「㩒爆」個計數機，都唔可能買晒心頭好；或者曉士掛多幾隻襪仔喺屋企，睇吓老細定聖誕老人，送多幾轉禮物畀佢啦！