劉錫明近年長留「好多引誘」的內地工作，但他直言上天賜了最好的女人給他，因此絕不會做對太太不住的事。
記：家人對你影響好深？
劉：其實係喺02年我個女出世之後，覺得自己好幸福，有太太照顧，又有自己嘅女，真係好幸福，好多嘢都唔想再計較，再去諗。
記：點樣認識太太？
劉：我94年去咗台灣發展，95年做嘢，識咗當時做綜藝節目製作人嘅太太，96年又撞番，好有緣就開始咗。我哋01年喺香港註冊，好記得01年9月16日喺台灣擺酒，嗰日就打十號風球，當時好擔心，因為擺成30圍酒，冇人嚟點算，我心諗：「香港咁黑，唔係去到台灣都咁黑？」終於開席前，好多人陸續嚟恭喜，坐滿晒全場，先放心。
「返內地工作好痛苦」
記：太太係台灣人，捨得你去內地發展？
劉：拍拖之後，我2000年返咗內地發展，初時都唔想去，係太太鼓勵我，之後生咗個女，更加唔想去，每次返內地工作都好痛苦，太太好支持我，成日帶個女飛嚟探我，令我感受家庭溫暖。
記：太太知唔知你俾倪震唱衰嘅過去？佢嬲唔嬲？
劉：佢係台灣人，唔係好知當時嘅情況係點。佢係一個好體貼、溫柔、唔易嬲嘅人。我嘅財政大權全部交畀太太，我哋係細水長流嘅感情，啲人話「喂，內地好多引誘」，我係返內地發展，但我絕唔會去滾，上天已經畀咗最好嘅女人我，我唔會做對唔住太太嘅事。