經濟唔好,個個慳住荷包,高官好似煲呔曾同唐唐都出嚟買嘢做show,呼籲市民消費刺激經濟。難得亞洲國際博覽館、旅發局同香港廸士尼合作度到條好「橋」,以邊工作開會邊娛樂做噱頭,近日吸引咗成6000名獅子會海內外會員嚟港開會兼消費玩樂,幫補一吓本地嘅經濟。
本月初,第47屆東南亞獅子大會一連4日,喺亞洲國際博覽館舉行會議,之後去咗廸士尼玩一轉,仲由旅發局安排節目同觀光行程。
呢批優質商務旅客當然係各方爭取嘅對象,旅發局總幹事劉鎮漢話,已經新成立咗香港會議及展覽拓展部,專攻呢批高消費客。
唔知係咪對香港印象良好,大會選咗嚟自香港嘅譚榮根做國際獅子總會第二副會長,係有史以嚟首位港人獲此職銜,睇嚟自己地頭係旺佢嘅。