【偽情日記之風水輪流轉】劉錫明當年一句欣賞周慧敏惹來倪震口誅筆伐，慘被冠以「毒瘤明」稱號，無奈逼走中、台兩地發展。不過風水輪流轉，自從倪震賤男現真身遭全城插爆後，劉錫明大方原諒昔日仇敵備受網民激賞，一吐17年「毒瘤」烏氣，昨從成都「消毒」回歸的他更被各方製作人爭用。
劉錫明90年代初期曾受無綫力捧，被封為劉德華接班人，豈料他在電台公開讚賞周慧敏後即惡運纏身，遭倪震冠以「毒瘤明」的稱號及在雜誌《Yes！》狂插3年，令他無奈轉戰內地及台灣發展。及至早前倪震偷食斷正，賤男終極現形，忍辱多年的劉錫明公開原諒仇人，隨即鹹魚翻生兼贏盡網民心。自認中坑之齡孔雀開屏的倪震還「種瘤得瘤」，網民抵死地轉移毒瘤，嘲笑他「毒瘤震」。
收帖必到
陽明山莊賀倪周
「中毒」17年的劉錫明成功消毒，他昨早從成都返港，為見記者專程備戰，航班降落後1小時才現身，精神奕奕的他悉心畫眉梳靚頭，戴黑超着皮褸，超具90年代「華Dee」feel。對於倪震和周慧敏結婚，劉錫明認為毫不突然，他說：「有時擁有嘅嘢，冇咗先知重要，好似隻腳咁，冇腳先知唔方便。佢哋覺得冇咗對方都唔得，決定係深思熟慮嘅，19年感情如果分手好可惜，𠵱家結婚咪幾好，希望佢哋好似中國送畀台灣嘅一對熊貓團團圓圓咁，快啲生番對龍鳳胎。」有傳倪震和周慧敏下月5日在陽明山莊擺酒，若二人發帖給他，他稱有時間的話必到。
劉錫明又稱之前聞悉倪、周分手不感心凉，雖然與倪震曾有過節，但他說：「過去由佢過去啦，唔係門面說話，衷心祝福佢哋。」不少網民對倪、周結婚不看好，劉錫明則唱反調：「我睇好，回首睇番呢對人經歷咗好多嘢，娛樂圈經歷更多，好多考慮，簽紙唔容易，我簽時都手震，簽名係需要好堅定信念。」問他會否覺得周慧敏很委屈？他說：「兩夫妻要互相扶持，冇話邊個委屈唔委屈嘅。」
監製首肯
或重返無綫拍劇
44歲的劉錫明趁倪震被全城插爆風騷回歸，曝光率大增，不少製作人也有意跟他合作。無綫高級經理（戲劇分部）劉家豪90年曾與劉錫明先後合作《烏金血劍》及《大家族》，劉家豪昨在電話中說：「有適合嘅角色會考慮搵劉錫明，佢嘅工作態度好好，不過要睇吓佢嘅近況點樣先。」無綫製作總監梁家樹曾與劉錫明合作《超能幹探》，他昨說：「如果有啱角色，我係有興趣再同佢合作，我會同啲監製傾吓，睇吓有冇角色啱佢做啦。」有線電視娛樂公關部發言人張小姐說：「我哋好歡迎同有才華嘅人合作，現在雖然冇具體合作方案，但唔排除合作嘅可能性。」
導演王晶則說：「林嘉華同于洋都可以返嚟發展，點解佢唔得？只不過佢離開香港咁耐，唔可以一下就做主角，因為佢已經係中生，可能要先做配角，如果有啱角色，我會搵佢拍戲。」蕭定一也稱有合適角色不排除找劉錫明演出。
另一邊廂的倪震形象破產，被全城喪鬧，故他只能在雜誌專欄自吹自擂，他昨在雜誌專欄刊登一封號稱是讀者來信，該讀者稱會支持他及買他的作品，但湊巧的是該來信與倪震行文風格近似；同時倪震又接受昨日推出的雜誌訪問，死撐自己不是不務正業，狂讚個人出版事業及自誇主持的電台節目有多成功，稱自己是有史以來最坦然面對風波的人，其結構性中年危機已突然消失、正高潮應付未來云云，狂妄自大表現無遺。採訪：李全
人靠衣裝：90年代浪子Look
「何模樣離開，何模樣回來」正好形容昨日回歸返港的劉錫明的一身形象。90年代在樂壇起步，卻因倪震封為「毒瘤明」而無處立足，一別17年，昨日抵港的劉錫明形象上可謂別來無恙，一身90年代造型經過妥善「冰封」，漸變色鏡片太陽眼鏡、黑皮褸牛仔褲，最「出」當然是無名指上的「賭神」玉戒指，貨真價實是90年代的浪子look全體，再配一個迷彩皮篋，絕！
專一丈夫VS傲慢才子
劉錫明
年齡：44歲
學歷：香港浸會書院音樂系畢業
性格：低調、大方、顧家
婚姻狀況：已婚育有一女
緋聞：周慧敏
演藝作品：歌曲《是緣是債是場夢》、《MoshiMoshiMoshi》、劇集《烏金血劍》、《超能幹探》
現時工作：在內地和台灣拍劇和出唱片
倪震
年齡：44歲
學歷：佛羅里達州大學社會科學學士
性格：孤寒、恃才傲物、大話
婚姻狀況：下月與周慧敏結婚
緋聞：張茆、傅穎、陳穎妍、模特兒Esther、姚樂碧等
演藝作品：藝康相機廣告、電影《奇蹟》、電台節目《三個寂寞的心》
現時工作：與友人合資桌球室及為雜誌撰寫專欄
資料來源：《蘋果》資料室
一網講盡：網友撐劉錫明返TVB
倪震偷啜事件斷正，令被他唱衰而避走的劉錫明再次在港傳媒曝光，日前香港討論區更有網民貼出「一人一票支持劉錫明回歸TVB」，發起人wargods更希望與劉錫明合作過的無綫監製高抬貴手，再請劉錫明回歸拍劇，當中有9成半網民支持，其中網民無敵大飛俠表示：「我保證，我一定支持到底，拍劇日日追，拍戲一定去戲院睇，出碟一定買正版（我十幾年冇買過正版CD），請大家一齊支持。我遲啲會在Facebook開group，一人一留言支持，令香港影視界高層了解劉生仲有市場，一定有錢賺，出錢捧佢復出！」
話你知：林牧師高調有玄機
倪震激咀偷食斷正後，無神論的他早前曾約會林以諾牧師（圖右），並有指他得林牧師開導。原來倪震的爸爸倪匡，在下月15、16日將與林以諾牧師及施永青合作舉辦褔音棟篤笑《笑看風雲變》，而三人去年曾舉辦《以諾檔案之老子．耶穌．衛斯理》。林以諾牧師在娛樂圈廣結人緣，曾與不少教徒藝人合作過。
