我哋偉大嘅政務司司長唐唐早幾日到銅鑼灣出巡鼓勵消費，重話食碗餛飩麵都可以帶動飲食業、物流業，何奇壯觀！我求大俠冇唐唐咁多身家，消費始終要計住計住，不過我就勸遠在英國嘅阿仙奴領隊雲格，應該響應唐唐呼籲，希望1月大力消費，購入幾名球員保持爭標機會。
阿仙奴連續兩場聯賽和波，已經畀維拉拋離3分跌至第5，雖然雲格喺周日踢完對利物浦嘅賽事中講：「冠軍要到5月先知，數字上我哋會鬥到最後。」不過中場法比加斯因為足踝傷可能最多要休息8星期，加上前鋒艾廸巴約對紅軍做咗紅牌阿姑，雲格賽後力撐愛將，話完全係球證偏幫：「冇咗艾廸巴約，對我哋梗係打擊啦！」艾廸巴約更加話，對手艾比路亞好似畀刀「拮」咁嚴重；無論點，boxingday作客維拉呢場大戰，冇法比仔同艾廸巴約嘅阿仙奴如果再有閃失，莫講話爭標，連爭前4都有難度。
唔增兵難保前4
𠵱家球隊水深火熱，雲格終於知道唔出手就等死，暗示1月會有「特別收購」；我就認為雲格都唔好再怨球證嘞，增兵搞番好隊波先係上算；大熱門人選係辛尼特嘅俄羅斯前鋒艾沙維，阿仙奴出到2,000萬鎊（約2.3億港元），辛尼特好難拒絕。燕豪芬嘅阿費利又係雲格前線爭兵人選之一，呢位22歲荷蘭進攻中場，剛剛先為燕豪芬一箭定江山，擊敗飛燕諾，估計身價至少1,000萬鎊（約1.15億港元）。
法比加斯受傷，丹尼遜又唔夠硬淨，雲格都想增加防守中場威力，雲格睇中烏甸尼斯嘅恩拿好耐，好可能以800萬鎊（約9,200萬港元）過檔。艾沙維同阿費利已經踢過今屆歐聯，就算1月過阿仙奴，都肯定16強對唔到羅馬，睇嚟雲格重視英超多過歐聯好多喎。
呢幾位新兵對阿仙奴有冇作用，我求大俠唔敢講，但艾沙維嚟到，阿仙奴起碼要請多位繙譯，阿費利出名易傷，起碼帶動倫敦醫療業。