十二月九日本欄批評梁耀忠議員自編自導鬧劇，事後有一位李姓讀者打電話向《蘋果》投訴版投訴左丁山對梁議員唔公道。「名采」編者傳真投訴狀畀左丁山睇；嘩，原來呢類電話投訴要由投訴組紀錄之，送呈董社、林副社、鄭總、蕭執總等等《蘋果日報》最高層負責人，只有大老闆肥佬黎除外。小小副刊作者見到呢啲投訴，咪話唔會震騰騰；容乜易畀《蘋果》letgo㗎！
收到投訴狀，左丁山手震震，腳軟軟咁重讀十二月九日專欄，發覺唔到邊度對尊貴的梁議員不公喎；罷駛堵路之事後幾日，號稱代表新界的士業界九成以上嘅代表已與運輸署長黃志光會面，達成協議，一場綠色的士堵塞機場風波，就此平息（起碼表面上），證明運輸及房屋局副局長邱誠武冇錯，佢唔見梁耀忠啲司機係啱嘅，梁議員究竟為邊方面嘅司機團體發話？呢批團體與罷駛、堵塞交通嘅司機有何關係？唔該梁議員向公眾解釋一下佢點解唔為「代表新界的士九成以上」嘅團體出聲，而為少數人出聲呢？
左丁山對公眾事務從來對事不對人，見到梁議員開記者會罵邱副局長罵得咁高興，先至寫一兩筆而已，𠵱家就好想知道梁議員對「綠的風波」之迅速平息有何意見？
香港勝在有言論自由，讀者李向《蘋果》正式投訴左丁山，「名采」轉來一封電郵亦有一位讀者Grace來函表示支持。Grace話：「好同意你對梁耀忠的看法，佢分明自己喺度玩嘢，點可以話要人即刻打一個電話，咁咪所有問題一個電話就搞掂，以後唔使開會啦，佢都唔使開立法會啦。我每天都坐新界的士返工，大約$17-$19，但都肉赤，畀錢買時間，算啦。但加得太多，連我這種短程客都唔搭啦。在大埔成日見的士冇客，真係不如平啲，我在早上上班繁忙時間都不用等車，希望左丁山你們見到不太合理的人和事要多出聲。」
現時經濟不景，不少人為咗慳錢，少坐的士，而自七月十一日以來，五個月之內，國際油價跌咗七成有多，石油輸出國組織喺十二月十七日開會後宣佈減產，每日削減二百二十萬桶，仍然難阻油價跌勢。的士價其實應該下調至啱，但政府肯批准的士短加長減，竟然仍然有人反對，啲既得利益集團未免漠視宏觀形勢。