時近年尾，加上金融市場咁波動，既然冇乜心水投資，cashisking，錢袋喺自己身穩陣啲。不過，前嗰排Mr.B問敏妮幾時再次啓動買樓計劃，佢無啦啦咁問，原來係因為收到封信。
封信係佢屋企附近嘅地產代理發嘅，內容係講有個客睇中咗Mr.B層樓，出價想買，所以個代理就寫信畀Mr.B嘞！
逆市而行冇可能
明眼人一睇就知嗰張係宣傳單張，首先Mr.B又冇放售自己層物業，斷估都唔會開放畀啲街外人參觀啩，所以代理口中所講嗰位客人，究竟點解會睇中佢層樓，真係耐人尋味！
再者，家陣樓市低迷，如果你係代理，有客搵上門，你估你仲會唔會寫封信畀個業主，問佢有冇興趣吖嗱？畀着係敏妮，第一時間摸上門拍門問啦。怕人話你白撞？敏妮怕做唔到生意多啲噃！仲有一樣係，據Mr.B講，嗰位「傳說中」嘅客人出價比市價高，完全係逆市而行，冇乜可能。
Mr.B當然睇得出封信，宣傳多過真實，但佢唔明係，寄一封信成本起碼1.4蚊，仲未計裏面嗰張「傳單」同個信封，齊頭計1.5蚊一封，寄畀10個客就15蚊，寄畀100個客就百五蚊，Mr.B話佢隔個星期就收到，雖然計埋可能只係一千幾百蚊，但呢啲信，寄咗斷估都冇回頭，咁究竟點解仲要嘥錢寄信呢？
主動出擊為求存
敏妮一時間都答唔上，但呢啲咁嘅時勢，難保唔會有人等錢使，呢張傳單可能有「提醒」作用，又或者真係有人見到「傳單」，會嘗試將個盤畀地產代理放售。
做生意嘅，冇生意就冇收入，打開門做生意，燈油火蠟點都要維皮，唔可以坐以待斃，低成本博有生意，都係求生啫！
溫敏妮
http://wanmanli.com/blogs/