【廣州直擊】08年大事連連，劉嘉玲前晚在廣州出席活動，揚言過去一年是悲歡離合交集的一年，最開心是和梁朝偉結婚，展開更安穩、成熟的生活；也心痛四川大地震、金融海嘯。剛好踏入樂壇18年的郭富城，則忙於拍其代表作，但仍會抽空選購聖誕禮物給熊黛林。
劉嘉玲、郭富城、剛卸任的07年世姐冠軍張梓琳、奧運冠軍陳一冰和張怡寧等，前晚在廣州出席麗柏廣場5周年晚會。大會安排眾星坐林寶堅尼入場，愛車的郭富城更親自做司機，接載劉嘉玲到場。穿Givenchy短裙的劉嘉玲，下車時險些走光，不過不斷有市民高呼她梁太，令她甚冧甜笑。
生BB上天安排
劉嘉玲自爆首次坐林寶堅尼，可惜車程太短，更叫城城載她兜風，問她是否愛林寶堅尼，她即笑說：「係呀，好鬼堅，不過我唔鍾意太快嘅車。」時近年尾，劉嘉玲揚言08年發生許多事，她說：「最開心當然係自己結咗婚，同埋好多人結婚，搵到另一半。唔開心係天災，地震同金融海嘯，悲歡離合交集一起。」她謂婚後感覺很好，她說：「覺得自己成熟咗、長大咗、安穩咗，生BB就睇上天安排。」
城城透露今年是加入樂壇第18年，完成心願在世界各地做了多場個唱，又打入健力士，他更視正在開拍的電影《殺人犯》為代表作。講開車經，城城即時停不到口，有指余文樂黐城城、沈嘉偉等玩車，其實未夠班，城城說：「因為沈生鍾意玩車，好多嘢係佢影響到，樂仔係年輕人，同佢食飯都幾得意呀，我大佢一個對，朋友冇分……工作唔工作，我唔覺得有唔夠班呢樣嘢。」
城城玩車作獎勵
堅持玩車的城城，稱不會再受沈嘉偉影響，他說：「我要創出新血路，有啲車我唔再玩，儲車如儲錢，自己唔係要住超級豪宅，𠵱家已經足夠，車係獎勵。」問聖誕送甚麼禮物給熊黛林？他說：「諗一諗先，未知送乜，買聖誕禮物畀朋友好正常，熊小姐都係我朋友。」
採訪、攝影：IngridChan
