經常大戰維園阿伯嘅《城市論壇》監製兼主持謝志峰，曾經任職亞視新聞部；論壇噚日剛好討論亞視風雲，佢慨嘆亞視搞成咁，好欷歔之餘，仲不忘搞gag，話亞視其實「仲有一個笑話」。話說以前邱德根做老闆時，因為廣東話講得唔正，班員工成日聽到佢叫亞視做「喫蕉電視」，謝志峰話：「個名難聽，但道出咗好慘嘅命運。」
飛哥叫王維基再上堂
一位經常舌戰謝志峰嘅維園阿伯，亦喺現場自稱任職亞視18年半，唔滿意謝志峰唔畀面佢，唔畀佢發言。節目嘉賓「飛哥」李鵬飛就爆料，話「魔童」王維基其實係自由黨創黨委員，當年「魔童」30歲由加拿大返香港時，雙方已經認識。對呢位舊黨友，飛哥話「魔童」當年做事「好有衝勁、好有諗頭」，讚佢搞出個城市電訊，令港人打長途電話可以平啲，算係一個唔小嘅功績，但飛哥對「魔童」嘅管理技巧不敢苟同，認為佢唔應該狂踩員工，勸佢返中大上堂，「因為佢喺中大攞咗個EMBA（行政人員工商管理碩士）後，都未學識管理重點。」