提起身邊這個「膠」字，靚仔博士歐陽偉豪可以講足幾粒鐘，譬如「膠」字在漢字史上的起源，在語法上作為名詞、副詞、形容詞時候的作用，以至在各種文學體裁上的應用問題。這位在電視節目《最緊要正字》中出了位的中大講師，最近頻頻鑽研時下hit爆「潮語」，把網界潮童的社交詞彙推到大專學府。
「近一、兩年學生嘅論文，成日攞潮語做題目，所以多咗機會接觸。最近仲有公開論壇研究潮語，畀大家從多方面分析。」中文大學中文系高級講師歐陽偉豪是少數正面看待潮語的大學學者，有人說潮語污染中文，他反問：「我舉個例子，『一個潮童加一個潮童等如兩個潮童。』你話畀我聽，個『潮』字污染咗啲乜？污染咗語法？文字？定係個潮童嘅生命？」
被「hea」難倒
最近特別多人關心潮語，歐陽偉豪嘗試提供一個解釋：「近來好興講保育，一個碼頭要保，一棵樹又要保，我哋中大嘅烽火台又要保，點解近期特別多人注意潮語，可能都係對本土文化嘅一種保育。」
作為大學教員，歐陽偉豪只想因勢利導，好好利用潮語。既然大學生閒談之間滿口都是潮語，不如透過潮語帶出漢語的文法問題：「譬如個『頹』字，潮語嘅例句係『我今日頹瞓咗十幾粒鐘。』呢個係形容詞作為副詞嘅做法，將雙音節『頹廢』變成單音節，利用咗漢語過千年來嘅偏正結構，可以叫做復古。」
至於潮語的正音正字，靚仔博士有時也被難倒。例如「hea」字，誰人最先使用這個有音無字的單音來形容漫無目的？歐陽偉豪只能勉強推斷，可能是源自上一代的方言：「你有冇聽過阿婆講：『唔好hea亂我啲嘢！』當中個『hea』字就有漫無目的嘅意思。」
提起正音就自然想起何文滙，人家都說歐陽偉豪是其門生，其實靚仔博士從未正式受教於何文滙。歐陽偉豪對正字正音的執着也有別於何文滙：「語音唔係科學，唔係一加一等於二……人妖個妖正音係「腰」，但係你跟團去到泰國，唔通同個領隊講，我想睇人『腰』咩？」
記者 蔡元貴