「金刀梁」梁智鴻噚日喺港台，訪問同屬醫生出身嘅阿瑟王李國章，兩大名醫坐埋一齊，當然離唔開講吓醫學問題。金刀梁話，自己把金刀其實只係鍍金，李國章把刀至係真金，仲話「有乜都會搵佢割」。雖然被金刀梁讚佢醫術高明，但63歲嘅阿瑟王卻講明唔想俾金刀梁割番轉頭，話「因為佢（梁智鴻）係泌尿科」。
做過中大校長同教統局局長嘅阿瑟王，𠵱家正享受緊退休生活，金刀梁就笑佢係「雙失長者」。阿瑟王話退休人士懶開，其實好易癡呆。金刀梁問佢擔唔擔心會成為其中一分子，阿瑟王就貫徹佢寸人於無形間嘅風格，話：「我可能已經癡呆咗，如果唔係唔會入政府。」