英格蘭球星碧咸上周六抵達米蘭，老婆維多莉亞全程「芒」實。又係嘅，意大利咁多靚女，唔昅實容乜易老公都冇埋？首位挑戰者係意大利性感女主持達美歌，不過呢關維多莉亞總算過咗。
碧咸做訪問不敢斜視
話說，意大利天空電視安排咗達美歌「單挑」專訪碧咸，碧咸嫂原本呷醋要取消安排，但最後都妥協。呢個達美歌殺傷力驚人，年齡33歲（細碧咸嫂一年），係前祖記總經理莫治個仔嘅女友。大家都知碧咸鍾意臀部同上圍豐滿嘅女性，呢個達美歌就係天然36、24、36身材，「加建過」嘅碧咸嫂唔眼紅就假啦！
從私人飛機、專車入酒店，碧咸嫂好似FBI咁木無表情，不時展示結婚戒指，向達美歌宣戰。之後老公舉行記者會，台下碧咸嫂面對鏡頭藐嘴瞪眼，實行隔空挑釁！到達美歌單挑碧咸環節，碧咸嫂自然廁所都唔去，搞到成個訪問大都圍繞足球，老公亦目不斜視，夜晚番酒店唔使扭耳仔。
不過，達美歌縱橫主持界多年，又點會唔挑逗吓呢？佢問：「會唔會留喺米蘭多過3個月？」碧咸話會準時返銀河，跟住即刻向老婆表忠心：「維多莉亞好鍾意米蘭，我哋只會留3個月。」咦！之前碧咸嫂話唔會去米蘭住㗎？碧咸呢次一定要專心踢波啦！
32號波衫冇特別含義
此外，碧咸波衫號碼亦落實係32號，佢解釋冇特別含義，「佢哋話32號，我咪照着囉！」佢首場正式比賽係1月11日作客羅馬，最後一仗係3月8日對阿特蘭大。據講，呢3個月兩公婆會住萬二蚊港元一晚嘅酒店公寓，仲會一齊喺電視節目《BigBrother》任嘉賓㖭！