【海嘯求存】你好，我叫梁耀忠，千祈唔好誤會，我唔係立法會議員嗰個梁耀忠，我只不過係一個汽車經紀，一個喺二手車行打份sales工嘅小人物。金融海嘯殺到埋身，我搵食嘅汽車業已經敲響喪鐘，𠵱家日日企足九粒鐘，都未必做到一宗生意，聽日分分鐘仲冇埋份工。不過，我都會撐到最後一分鐘，我對自己講，唔使驚，呢個世界沒有不景氣，只有唔爭氣，希望捱得住，唔使去搵嗰個「街工梁耀忠」！ 記者：廖韻思、黃學潤
每當客人聽到「梁耀忠」這個名字，總會「另眼相看」，但這個名字沒帶來甚麼「着數」，除了被人開玩笑，「仲試過返大陸，過關時被人扣咗喺間房度查咗半個鐘。」所以梁耀忠喜歡別人叫他英文名阿Joe。
「冇諗過會冇工做」
阿Joe是一家二手車行的sales，入行三年，這兩年好景時月入40,000元，最差也有15,000蚊，用他的話說：「勁過好多大學生。」但一場金融海嘯打殘了整個汽車業，港九新界多個二手車展銷場都陷入死寂，包括阿Joe所在的展銷場。上個月初的兩個星期裏，平均每天下午只有一、兩名客人，經紀不是在「打牙骱」，就是躲着打機。「幾乎日日都係咁，好多車行一架車都賣唔到，有幾間頂唔住已經執咗笠。」
「冇辦法，個市差到咁，車又唔係必需品，唔同買罐汽水買棵菜。」上月賣出一輛60萬平治房車的阿Joe，曾經「游手好閒」一段日子；幸而臨近聖誕節，憑他三寸不爛之舌賣出四部車。
不過收入減少，一切慳得就慳。婚後與妻子住在牛頭角淘大花園的他，以往搭的士到九龍灣展銷場上班，但現在走到德福廣場坐穿梭巴士，「報紙慳番唔買，上網睇；食飯咪揀啲特價餐，有時食個杯麵，夜晚返阿媽度黐餐。」
今年37歲的阿Joe，22歲時學人做生意，一度在旺角信和和灣仔開設兩間日本精品店，又豪掟23萬買了一輛SkylineGTT跑車。不過，接連而來的金融風暴和沙士，令他「輸到趴街」，但「馬死落地行」，他去做廚房、工廠、酒店保安、跟車送貨，「試過日頭做7-11，夜晚做馬會，一個月都有7,000幾。」但今天，阿Joe感到害怕，「以前從來冇諗過會冇工做，𠵱家真係驚，見到啲大公司係咁裁員，一日比一日心寒。」
「捱到最後一分鐘」
阿Joe每天回到展銷場，便為一輛輛二手車掃去灰塵。記者去車場拍照，他顯得很緊張，一見到有客人來，立即叫記者快走，轉頭再來。「冇辦法，做生意緊要。」
阿Joe說，勤力、醒目、唔怕蝕底，是他在金融海嘯下的座右銘，為了爭生意，要耳聽六路眼觀八方。他試過去洗手間途中，聽到有客人向一家車行經紀說要找一輛黑色寶馬，但車行沒有，他連洗手間亦不去在附近等，直等到客人離去時上前「兜客」，成功做成生意。
「做Sales有時唔係賣貨，而是賣人。」阿Joe笑說入行時，師兄一席話令他開竅，「成個車場咁多經紀，點解個客要幫襯你？梗係要個客對你有信心啦！」市道差，他也「打定底」，「我會捱到最後一分鐘，仲想考多幾個車牌，點衰都可以揸的士，希望唔使去搵嗰個街工梁耀忠。」