唔只香港人關心西九文娛藝術區最終係咪會變成大而無當嘅大白象，就連歐盟官員都好留意西九計劃，而且仲有唔少建議。據早前以學者身份應邀飛咗去布魯塞爾參加研討會嘅公民黨秘書長陳家洛透露，某次會上講起香港問題時，唔少委員都噏得出西九計劃，證明佢哋係高度關注。
有個來自法國嘅委員更加抵得諗，幫埋香港政府度橋，等西九呢幅矜貴土地唔使嘥；有咩建議咁巴閉？原來係叫特區政府喺嗰度整個winemuseum，包保參觀者源源不絕。唔少現場人士聽到都笑笑口表示認同，證明呢條橋有得諗。既然西九管理局主席唐唐閒來都鍾意嗒番兩杯，相信呢條橋佢都受落。