仲有十日，2008年就完結。所謂官場廢話年年有，今年似乎特別多；回顧呢一年，班官員全年未停過發放廢話。既然年尾通常都要選舉十大乜乜、十大物物，有團體噚日索性搞個「十大官場廢話」選舉，喺旺角行人專用區畀市民選出心目中「廢中之廢」嘅廢話。結果以一做局長就先聲奪人嘅劉吳惠蘭最犀利，上任唔夠半年，已有兩項代表作，包括得罪商界嘅「奸商論」、同辣㷫打工仔女嘅「減薪一半」偉論。
除咗劉吳惠蘭，警務處都一門「雙杰」。年初單藝人淫照案轟動全城，助理警務處長黃福全同一哥鄧竟成兩兄弟拍住上，前者話市民將不雅照片傳畀唔識嘅網民係違法，傳畀朋友就唔犯法，搞到大家突然多咗好多朋友；後者就警告網民，話就算藏有一張鹹相亦可能犯法，搞到網民生活喺白色恐怖中，連電郵都唔敢開。
陳克勤有大量年輕票源
至於「視民望如浮雲」嘅煲呔，同死撐泰國包機事件係「集體決定」嘅唐唐，喺呢個「廢中之廢」選舉中，就首次充份獲得民意認同，唔少市民都投佢哋一票。但講到網上最熱爆，呢兩位特區政府高層，就拍馬都唔及過去喺政府幫手斟茶影印、但月𢭃七萬幾公帑嘅前特首辦特別助理陳克勤。
搞呢個選舉嘅107動力召集人何民傑話，陳克勤當選立法會議員後一句「搓mybreast」，到𠵱家喺網上嘅點擊率仍然超高，高過陳克勤喺立法會嘅得票好多倍。八方喺旺角街頭現場直擊，克勤今次真正如佢所願，成功開拓大量年輕人票源，得到唔少年輕人投佢句金句一票，差啲就大熱勝出。可惜，最終仍然不敵劉吳惠蘭嘅「奸商論」爆冷贏出，獲選為年度「廢中之廢」。
何民傑話今次個選舉，係想大家重溫呢一年官場廢話之餘，亦希望一班高薪厚職嘅公職人員，日後講嘢可以先經一經大腦，唔好係又噏唔係又噏，「好似食雲吞麵可以救經濟呢啲，唔該真係可免則免。」佢又話，個人會投劉吳惠蘭「減一半人工」論一票，認為最適合應用喺呢班高官身上，先減佢哋一半人工。
mailto:[email protected]