特首帶頭消費，高官掏腰包跟隨，政黨都有樣學樣，民建聯聽日由主席譚耀宗帶隊，同埋監委會主席楊孫西，一齊去工展會血拼，該黨立法會議員、區議員、中委都冇得走雞，要跟大隊進行政治性消費，今次真係唔慳得。
高官表演購物消費騷，動輒花千元、萬元，民建聯係香港第一大黨，又有副局長、政治助理，係半個執政黨，促進經濟都不能太寒酸，民記中人唔肯透露準備咗幾多「彈藥」去工展會掃貨，只係話各人心裏有數，以高官做標準，八方相信使幾千蚊係最低消費。特首、司長份糧由納稅人出，佢哋使錢，嚴格而言都係市民埋單，民建聯成員購物，唔知黨中央有冇津貼呢？