政務司司長唐英年終於出動，唔係宣佈選特首，係行街消費。上星期六煲呔去工展會一擲萬元救市，噚日輪到唐唐，上晝拖埋老婆，搵埋德成局長、「減薪」局長劉吳惠蘭、民主黨李華明，同埋自由黨方剛去老銅，先去波斯富街池記食雲吞麵，呢間麵舖以好食兼貴聞名，最近獲米芝蓮推介，唐唐一行人要400幾蚊埋單。
重提菠蘿包救市論
食完麵正式開始血拼，首先幫襯義工買旗，唐唐捐咗張紅衫魚。唐唐係上海人，去到「上海老三陽」，掃咗湯圓、八寶飯、年糕、上海糭等，盛惠290蚊。之後去莎莎，呢度自由行必到，有幾個自由行見到咁墟冚都湊吓熱鬧，八方聽到有人話：「呢個咪財政司唐乜嘢囉。」
唐唐喺度買咗650蚊護手霜、潤膚露、潤唇膏套裝，化妝小姐話近排天氣亁燥，司長買護膚品潤吓啱晒。八方笑問有冇高官合用面懵膏賣，個售貨員好精靈，「呢樣嘢長期缺貨，一返貨就賣晒。」八方笑到氣咳。買完化妝品，唐唐轉攻電器，去百老滙買咗部2,790蚊嘅SONY黑色數碼相機，據講係全港唯一拍到高清影像嘅新機，唐唐兩公婆即場玩自拍。行咗半朝，唐唐最後去到皇后餅店買咗1,880蚊曲奇同1,200蚊鳥結糖送畀記者。
煲呔行工展會半小時花咗成萬蚊，唐唐係下屬，自然識得睇住條數嚟使，所以又食又買都係使咗6,000幾蚊，離開時又捨司長專車改搭的士，話要幫吓司機喎。煲呔有「士象全」救市論，唐唐噚日則重提「菠蘿包救市」，呼籲市民按自己能力消費，佢話食碗麵，喫個包、蛋撻，或者買件鬆糕都可以救市，因為當中涉及製造、服務同物流業，可以創造就業機會，所以大家使錢之餘，仲可以保就業。
高官連續兩個星期真人表演刺激消費購物騷，實際有冇用呢？麵舖老闆話生意冇多到，老三陽則話今年人人手緊，司長豪爽於事無補。煲呔喺工展會狂掃嘉頓麵包同即食麵，唐唐就叫人食包食撻，可見高官救市招數萬變不離其宗，都係得把口。
mailto:[email protected]