咪以為聖誕前夕，碟場就有好多選擇，可能片商覺得大家聖誕大把節目，應該唔會留喺屋企煲碟啩！行入碟舖，今個星期新返港版影碟應以《武俠梁祝》較有睇頭，雖然故事熟口熟面，不過話晒都係當紅嘅吳尊同阿Sa擔正，有星睇，又有武打場面，聖誕節煲碟頂住先啦！
記者：許福合
武版梁祝改到七彩
見到戲名自然會聯想起《梁山伯與祝英台》，不過《武俠梁祝》經過改編之後，與原版已不同。同樣由女角祝言之（阿Sa飾）女扮男裝，但唔再係學堂讀書，而係去逍遙派學武功，亦係何解會變成《武俠梁祝》！
戲中會出現人物仲有吳尊飾嘅大師兄──梁仲山，反派嘅胡歌飾馬承恩，再加庾澄慶間中出場搞吓氣氛。故事都係由師兄師妹最初鬥氣、了解，到後來知道師妹女扮男裝，相互傾心，最後劇情急轉直下，進入悲劇模式，逼婚及被追殺，最後殉情收場。
吳尊演嘅梁仲山經常掛住口頭禪「何足掛齒」，感覺幾搞笑吓，加上經常有近鏡大特寫，係Fans嘅話，應該會睇得幾過癮。至於阿Sa都算交到戲，雖然有一半係演番自己，但勝在可愛自然，與其話佢女扮男裝，不如話吳尊爛萬人迷Look、乸乸哋演唔出男人味，如果Cut咗後半段，我覺得阿Sa似男主角多啲。
Bouns：偶像導向冧Fans
雙碟裝DVD及Blu-ray會有加碼Bonus內容，大家可睇到戲中演員講吓拍攝趣事；另外亦有NG鏡頭剪輯，唔講你唔知，睇過NG片段之後，先發現原有看似流暢畫面，其實曾經多次NG先拍完㗎！如果仲唔多夠喉，可以煲埋MTV及相片集，全隻Bonus完全係Fans導向！此外，雙碟裝更會附送吳尊、阿Sa月曆明信片（一套兩張），據稱限量送出，咁珍貴？搞到我都想買㖭！
DVD
$85（普通版）
$170（雙碟版）
Blu-ray $260
