泛民一行廿幾人，噚日浩浩蕩蕩殺去澳門，公民黨黨魁余若薇Audrey因事忙冇隨大隊一齊出發，搭遲幾班船，押尾單人匹馬闖關，但都逃唔過被拒入境命運，不過卻獲較尊貴待遇。據Audrey講，佢抵達澳門後被單獨扣留，間房佈置得幾骨子，有電視睇又有人斟茶畀佢飲。雖然呢間扣留室似貴賓室，但把門鎖都好巨型，相信係畀非一般貴賓享用。
Audrey話呢次係人生第一次被拒入境，對澳門政府好失望，因為佢純粹參加和平遊行，冇帶任何標語、橫額在身，澳門唔容許表達異見，好離譜。俾鏵哥攞咗「第一次」，Audrey笑言最唔抵係手信都冇機會買，又話其實打算遊行後去食澳門知名豬扒包，可惜緣慳一面。Audrey被澳門打回頭，冇咁易罷休，返香港後去咗幫襯澳門茶餐廳。