又到年尾，各傳媒早已準備好二○○八年大事回顧，今年之大事多到數唔清，如四川地震，北京奧運，金融海嘯（又可細分起碼十大事件）等等，點知呢幾日又爆出馬多夫騙局，亞視高層鬧劇，睇都睇唔切。傳媒老總Y對左丁山講：「幾乎日日大事回顧特輯版面改，希望唔好再有大新聞咯，否則我啲兄弟會做到氣咳。」同成班老總食食吓午飯，傳出張永霖會在下午三點鐘在美麗華東宮見記者嘅消息，各老總連忙打電話畀下屬分派採訪工作，到咗兩點十五分，幾乎人人走晒。美麗華東宮好細啫喎，假如各傳媒派人湧入去，逼爆玻璃都似！
點知到咗咁上下，又傳出張永霖臨時花門，話有要事在身，唔得閒由大埔出尖沙嘴與記者茶敍，於是啲記者撲個空。老總Y來電話：「張永霖甩底唔緊要，我哋最怕佢與任何一家傳媒做獨家訪問啫，當然如果係亞視獨家，我哋唔會有聲出！」咦，關偉走咗，梁家榮留任，成為亞視新聞總管，以佢嘅新聞觸覺，不妨諗諗佢，做番一個新聞專輯，就叫做「名妓魔童十二天」，包保叫座（夠晒娛樂化嘞啩），又或者斯文正經啲，改名稱為「亞視風雲288」（按：十二天有288小時）。
既然人人雞咁腳走咗，左丁山亦向主人家告辭，諗住食飯時，件冷衫畀魚汁滴中，而且件冷衫已着咗十幾年，不如近近哋就去永安百貨公司買番件新嘅，順便換番一個永安通勝月曆，呢個月曆應算係香港集體回憶一部份，每年聖誕前派發，派咗幾十年，有啲老人家專登就喺呢個時候去幫襯永安。
點知自己着慣嘅牌子Jaeger與Pringle竟然冇得賣，一位年紀大嘅售貨員禮貌好，對來路貨知識豐富，佢對左丁山講：「先生，呢兩隻英國名牌冇賣好耐咯，冇咗代理啩，買啲新牌子啦！」於是想起曾在馬場碰到紡織L，佢話蘇格蘭茄士咩即係內蒙茄士咩啫，蘇格蘭牌子買啲最靚嘅中國茄士咩，在中國加工，運返英國做finishing，就係英國製成品，但即管如此，售價仍然好高，在香港市場不大。
既然不見舊名牌，購物興致索然，電話響起，傳媒大姐邀約參加聖誕酒會，於是同佢開玩笑，「不如你去亞視做CEO啦！」傳媒大姐連忙sayno。佢話亞視呢檔爛攤子好惡搞，張永霖唔係神仙，可能好快就會換人！真杰，查先生為身體健康，幾年來清心靜養，不知何故，竟會買入亞視控股權，𠵱家咪煩親自己？