聖誕就快到，想買份心水嘅AV產品慰勞吓自己，早幾日小藍走上去中環影音專門店AVCONSULTANT昅吓有乜新貨，點知就搵到件好嘢。該店老闆Alan啱啱引入咗美國喇叭製造商Soundmatters最新產品foxL便攜式喇叭接收器。小藍一睇，吓，好似一個眼鏡盒咁大，啲聲得唔得㗎？
Alan笑笑口叫小藍唔好睇小呢個喇叭接收器，咪睇佢體積細細，原來功能多多兼好聲。佢話，呢個喇叭係由美國太空總署前工程師設計，只要裝有藍芽裝置嘅手機、電腦等，10呎內可以無線傳啲歌到喇叭仔播放；如果冇藍芽，插線都得。
售2380元
Alan話，一般喇叭仔嘅弱點係啲聲薄，唔夠低音，但講都唔信，呢部機背面加咗個超低音喇叭，令低音完美呈現，「到目前為止，都冇部喇叭仔嘅音質滿足到travelers（旅行者）嘅需要，foxL一出就可以解決呢個難題，出門旅行、公幹都可以聽到靚聲。」Alan話呢部機除咗有娛樂成份，仲可以開會或者演講用㖭。
同Alan傾傾吓，突然間有個西裝友走入嚟指明要試呢部foxL。Alan聽到打個突，話部機仲未出街，唔明呢位客仔點解咁識貨。呢位「不速之客」即場試聽，大讚喇叭細細咁好聲。小藍睇睇吓，先發覺呢位人兄來頭不少，原來係無綫電視業務總經理鄭善強，佢仲一口氣買咗三部，每部2,380元，掃清現貨，截咗小藍糊。
逢周六刊出