各大頒獎禮就嚟開波，今年點睇？「信心有嘅，今年又做過拉闊又出咗碟，成績應該好過上年。」四個大男人最齊心係呢一刻。
之後一人一句，Otto話Osman揸過Civic大踢似爛仔，Osman又話Eric手車麻麻哋，Otto又話番Eddie人車合一Matrix咁款，Eddie話對農夫車深表興趣時，有架Hulix嘅Otto再嚟：「佢買農夫車我就換車喇，費事一樣。」EO2講到做嘢就合作無間，傾到車經就各有喜好。
文：嘴嚼爺
攝影：譚盈傑
Eddie最愛個斗
Eddie，光頭羊咩鬚太陽眼鏡，個樣寸寸貢咁駕着HondaSpike到達，「我好斯文㗎，之前架Echo揸咗8年，因為我鍾意空間感多啲，其實我之前都有睇過啲Pick-up（農夫車），不過最後睇唔啱先買咗架Spike。」
SsangyongActyonSports又點睇？「最正梗係用柴油，慳唔少。而且21萬車價算幾平，Pick-up最型梗係個斗啦，6前速加減波幾好玩。」其實軚盤有埋加減掣，同級只此一家，141匹雖無驚喜，但31.6kgm/1,800-2,700rpm扭力先係主角，Turbo偈四輪驅動有一定越野性能。
Otto獨愛舊農夫
咁啱Otto又係揸Pick-up，仲係Pick-up友最愛嘅Hulix，梗要講多兩句：「我嗰架係00年特別版，係私家車牌，香港得兩架咋，啱啱出時一架好似係劉德華買，另一個就係我上手車主。我就鍾意四四方方啲，喺街度有時見到啲新款Hulix，都型，不過……」之後配合一個藐嘴藐舌斜睥表情，咁呢架Actyon你都睇唔上眼啦？「嘿嘿，又唔好咁講，人哋咁遠揸架車入嚟。不過，真係好似一架升高咗嘅私家車。」
「Dreamcar係美國嗰啲四四方方Pick-up，我啲喜好比較怪。」
Eric倒後鏡夠大
俾人形容死飛仔，Eric直認：「啱啱考車牌後真係買咗架大踢，仲要火紅色，都幾死飛仔，後尾仲發現原來係Lego車嚟（雜溝積木車）。幾危險㗎，有次成架車剷咗上花槽，後尾睇相，師傅話原來我最忌紅色車，仲要係火紅色。今時今日我都係享受坐車多啲。」雖然今日呢架新款Actyon一樣係紅色，但依然搵到位撐，「塊倒後鏡最好，夠大，方便擠暗瘡。」陣！
Osman車頭幾惡
現有座駕有好襯佢文靜Style嘅M.BenzA160，「我𠵱家就鍾意七人車多啲，載得人多抵啲！農夫車都唔錯，實用為上，用柴油都有自動波，慳錢啲又揸得舒服，而且感覺上好似好力過電油車，值得考慮㗎。車頭幾靚，啲電鍍幾夾，而且盞燈幾惡，不過設備豪華賣相斯文，都係唔似Pick-up。」
咦？四個人喜好觀點各有不同，又有報道話佢哋會解散，「其實係話我哋一直想有個人發展機會，如分開拍吓戲咁，EO2唔會散嘅。」Fans安樂晒，可以乖乖哋去聽歌喇。
最新優惠：3萬買齊Option
車價21萬多啲，對Option情有獨鍾者，少少哋加多3萬，襯埋最新套餐，包括尾斗活動冚、兩側腳踏、車頭電鍍裝飾、尾泵把連Brake燈等，家陣額外送埋皮椅畀你，OK抵㗎。
規格
引擎：1,998cc直4柴油Turbo
馬力：141ps/4,000rpm
扭力：31.6kgm/1,800-2,700rpm
傳動：6前速加減自動波，四驅
車價：$216,000起
查詢：雙龍香港（21172287）
