集無綫及英皇娛樂寵愛在一身的王祖藍，前晚現身維園的工展會，為其中一個家居用品攤位充當售貨員，他憑着出色口才冧盡街坊師奶，成新一代師奶殺手，不過卻忙中有錯，結果被阿婆窒冇記性，又被小fans請食檸檬，大為冇癮。
王祖藍前晚到銅鑼灣維園工展會，為一個家居用品攤位充當售貨員，十分受歡迎，不少街坊fans也來湊熱鬧，一向口才了得的王祖藍也甚為落力，出盡法寶𠱁街坊，吸引不少老中青fans購物。
不過當王祖藍正落力向一位老婆婆硬銷產品時，他問了老婆婆兩次貴姓，連老婆婆也嫌他煩說：「你咁冇記性㗎，你點記啲稿呀！」令到王祖藍面懵懵儍笑。
派唱片搶手
在人潮中又有一位小fans大叫他的名字，並表示認識他，不過當王祖藍問小朋友是否喜歡他？該名小朋友卻搖搖頭表示不喜歡，請他食檸檬，令他又一次受挫。王祖藍又在現場大派自己的新唱片，及送由陳寶珠主演的舞台劇《我愛萬人迷》門票，極為搶手。
搵錢多十倍
王祖藍在場接受訪問時，記者指其口才了得，他笑說：「我靠把口搵食喎！」又有記者笑他成為新一代師奶殺手，他說：「多謝大家捧場啫，我都想多啲人識我，𠵱家廣告拍多咗，今年努力搵錢，錢係多咗，比出道時多咗成十幾倍，我有叫家人嚟工展會買鮑魚。」
王祖藍又表示，他現在最想是儲錢買樓，並坦言早有大計，他說：「明年啲樓價會跌，所以明年先算。」他還承認今年無綫有不少工作安排，明年會以拍電影為主。
採訪、攝影：卓寶花
