喬治布殊總統雖然笨笨哋，畀美國人笑佢唔識英文，但呢位總統經常騎單車及健身，健康甚佳，最近唔知係唔係因為任期將滿，行將放下政治重擔，交畀奧巴馬接棒，所以心情輕鬆，周圍去與各國領導人講拜拜。去到伊拉克巴格達，見記者居然遇上記者向佢擲鞋，布殊不慌不忙，閃避得宜，顯見身手敏捷。呢個畫面，勢必在全世界電視台播完又播，成為布殊總統嘅伊拉克legacy。
公關專家Y睇有線新聞台播布殊避鞋畫面十幾次，打電話嚟講：「又學到嘢嘞，以後叫政治人物學足布殊，可以為形象加分。嗱，布殊見到隻鞋迎面而來，有四個選擇，（一）踎低畀板塊遮住，（二）用手擋，（三）閃避，（四）移步企在伊拉克總理後面。一秒鐘之內，布殊選擇最佳方法，就係第三項，而且閃得漂亮。假如佢踎低，形象盡失，如果用手擋，失總統身份，如果躲避在伊拉克總理身後，會畀世界人士鬧佢係懦夫。他日如果曾特首在立法會再次遭遇掟蕉事件，佢識得點做啦，就係閃呀，閃完企直，面露微笑，講番一句笑話，咁就攞滿分。」
布殊又係好嘢噃，起碼表面上笑容可掬，一啲都唔介意，表現無懈可擊，至於返到後台有冇向特工保鑣發脾氣，係另一回事。公關Y有時會訓練高級行政人員如何面對傳媒、學生及示威羣眾，相信布殊呢件伊拉克掟鞋事件必定成為佢嘅教材之一。
呢個畫面，YouTube不會錯過，不過既然在有線睇咗幾次，無謂上YouTube搜尋。偏偏餐廳R就來電叫左丁山上YouTube睇一套香港人集體回憶短片，香港一九三八年，片名叫做HongKong:TheGatewaytoChina（咦，今日香港都係咁樣向世界宣傳噃。），睇完之後，只能講一句：「正。」想知道自己出世前，阿爺時代之香港面貌，呢套短片（英文旁述）夠晒內容豐富，昔年香港原來咁繁榮，仕女上街，基層面貌，中環舊景，淺水灣酒店，一一入眼簾。自有咗YouTube之後，不少珍貴圖片上網畀我哋免費睇，呢套1938年紀錄短片香港人不可錯過。