為期4日的亞洲遊戲展昨日揭幕，繼動漫Maggie李曼筠兩年前憑性感彈出後，今年參展商大搞GameGirl選舉，風頭比遊戲展代言人楊千更勁，難怪19位參賽者前仆後繼，務求殺入娛樂圈。
亞洲遊戲展2008由昨日起至星期一於會展舉行，參展商Sony今日同場也舉行PlayStationGirl選舉，19位參賽者昨日曝光，佳麗當中包括選舉常客、曾參選港姐初賽出局的「翻版梁詠琪」湯傲欣（Decem）、「幼版JJ」胡心諾（Rainbow）、ECupBaby劉欣宜及其師妹ACupBaby顏后君（Ceci）。
千嬅人氣失色
一班青春少艾，昨日吸引大班影友拍攝，場面比身為遊戲展大使的楊千嬅出場時更熱鬧。現場又即時頒發最上鏡小姐獎，最後由22歲的ACupBabyCeci奪得。事後她接受訪問時即大搞爛gag說：「攞呢個獎係咪即係真人唔靚咁解呀？」之後又說：「我𠵱家都有freelance喺J2做旅遊節目，不過自己就想多方面發展，唔想淨係得個樣囉。」師姐ECupBaby劉欣宜則說：「我都有半隻腳叉咗入娛樂圈喇，出年可能會出書同埋寫真，但係希望大家唔好淨係留意我身材，可以留意吓我嘅內涵啦。」
身為遊戲展宣傳大使的千嬅，以一身極有型的打扮現身，她接受訪問時說：「其實我最想扮打喪屍game入面嗰個女主角，因為好完美，平時自己都鍾意打機㗎！」問到對商台叱咤頒獎禮冧莊進入女歌手五強時，她說：「每次都係平常心對待，頒獎禮對歌手有鼓勵意義，但係最好就將頒獎禮四合一，咁好似更加有代表性。」
採訪：藍文浩
攝影：陳慧安
話你知：卡通人物四圍走
近年遊戲展不乏cosplayer，昨日會場就有人模仿卡通人物小丸子以及聖鬥士，成為影友的拍攝對象，而他們所穿的服裝多由自己製造。為onlinegame代言的模特兒蔡嘉寶（AkinaP）以迷你裙、低胸衫上陣，也有數十名影友圍着拍照。
