八和會館噚日喺新光戲院舉行特別會員大會，投票八和係咪轉做非牟利慈善團體，汪明荃（阿姐）以主席身份現身，會員羅家英、阮兆輝都話贊成改革，點知中途突然殺出同阿姐傳不和嘅陳劍聲，佢一見傳媒就攞張聲明出嚟，話有雜誌指佢喺在任時將八和嘅3,000萬經費使得七七八八。
陳劍聲句句有骨
陳劍聲強調冇攞過呢筆巨款，所以會書面遞交畀阿姐處理，問佢支唔支持改革？陳劍聲句句有骨咁話：「老實講，轉咗會唔會影響到八和嘅資產損失、將來運作？轉咗係好我當然支持。」之後陳劍聲喺會內質問阿姐，好彩經驗老到嘅阿姐早就安排律師在場解答，結果以462票贊成、0票反對及3票棄權達成共識，八和轉做非牟利慈善團體。
雖然明知有人嚟踩場，但阿姐一於少理，對於陳劍聲嘅指摘，阿姐話：「我從來冇講過，我都希望會館有咁多錢。」阿姐又話遲啲會同理事會討論呢件事，噚日主題都唔係呢樣，又話要適當時間做適當嘅嘢，呢個道理小朋友都知啦！