經濟唔好，衣食住行樣樣都要慳，近排就有唔少好朋友提醒我，出街食飯時記得睇真啲有冇找少錢，因為佢哋最近都遇上類似情況。
大人出面即交回失物
朋友Yuki早幾日去一間快餐店買至愛嘅牛肉飯套餐，價錢$27.5，佢畀咗一張20蚊同一張10蚊紙合共30蚊個店員找錢。由於佢係牛肉飯癡，一見到盒飯就冇留意店員找咗幾多錢，食食吓先發現張單嘅「客付現金」打咗29蚊而唔係30蚊，再望多望枱面又真係找得$1.5。Yuki話佢冇可能會記錯自己畀咗幾多錢，因為29蚊要畀好多硬幣，30蚊就只係畀兩張紙幣，雖然一蚊係好少事，但就認為個店員無可能打錯銀碼，因為收銀機上嘅9字同0字位置唔接近。
另一個朋友阿安仲激氣，早排佢叫個讀小學嘅姪女攞張八達通卡去快餐店買嘢食，姪女見到啲薯條即時忘形，唔記得攞番張卡，之後返番去現場問店員，個個都話唔見張卡。阿安覺得唔對路，就帶埋姪女落去再問多次，點知啲店員見到有個大人出面，就突然回復記憶話搵到張卡！
其實，網上面亦有唔少人討論店員找少錢嘅問題，好似Saysorpo就話試過幾次喺荃灣楊屋道街市買早餐時被店員找少錢，每次都趁佢唔覺意找少幾蚊。Refina也試過畀100蚊埋張92蚊嘅單，店員只找咗3個兩蚊，佢朋友冇為意，好彩Refina精靈，問個店員後，竟然可以即刻拎多個兩蚊出嚟。
正所謂小數怕長計，雖然次次都係找少一、兩蚊，但其實計計吓都唔係小數目㗎。
逢周六、周日刊出
電郵：mailto:[email protected]