韓國天后李孝利前晚喺首爾舉行首場處女個唱，吸引8,000人捧場，雖然佢早幾日因為過勞而發高燒入院，但當晚佢仍然好搏命，唔止吊威吔出場，仲大賣性感，當正自己係女王，由戴上口罩嘅半裸男舞蹈員抬出場。之後佢又拎住皮鞭，騎喺鎖鏈纏身嘅男舞蹈員身上演出，令對方有如性奴，表現十分狂野。
組合再聚
李孝利又特別苦練結他，彈奏一曲《OnlyGodKnowsWhy》答謝歌迷，而Fin.K.L舊隊友成宥利、玉珠鉉同李真就畀面做嘉賓，令佢哋相隔3年再次同台演出，成宥利仲感觸落淚。李孝利話一班姊妹肯撐場，條件之一係應承咗大家之後會去非洲做義工。至於噚晚嘅尾場演出，就請來Rain同BigBang做嘉賓。