袁詠儀（靚靚）和羅嘉良前晚在中環拍攝無綫新劇《金錢誘罪》（暫名）外景，當中靚靚要強行把東西放入羅嘉良胸前的袋口，她笑言險些摸到嘉良胸前一點而感到很尷尬。兩人又拍攝一場強吻戲，雖然在一片聖誕氣氛之下，但靚靚表示遭嘉良強吻感覺「麻麻哋」，一點也不好受。
近日袁詠儀和羅嘉良忙於拍攝無綫新劇《金錢誘罪》，前晚兩人在中環皇后像廣場拍外景，劇情講述兩人鬥氣，靚靚硬塞東西入嘉良胸前袋口，屈他偷竊報警，嘉良即場強吻她，並向警方聲稱兩人是情侶以求甩身，靚靚被強吻後即狂打嘉良胸口。
摸男人胸尷尬
當靚靚把東西放入嘉良袋口後，即笑笑口說：「好尷尬。」之後兩人拍強吻戲，經過試位後便正式拍攝，靚靚和嘉良不需10次已經順利完成咀戲。事後問靚靚是否險觸及嘉良胸前一點而感到尷尬？她笑言只是開玩笑，問她被強吻有何感覺？她說：「麻麻哋咋，因為太突如其來，唔同一般，希望之後拍嗰啲可以enjoy。」
靚靚表示喜歡厚唇的男士，咀下去感覺不錯。至於被途人圍觀會否尷尬？靚靚說：「OK啦，如果尷尬NG咪仲要拍多幾次，所以不如一次過豁出去快啲搞掂。」靚靚又透露對住囝囝時，她會扮演超級衰人，因為不想太過縱容囝囝令他冇禮貌，她為了不想囝囝變得乞人憎，寧願犧牲一下扮衰人。
至於嘉良和靚靚拍咀戲有何感覺？他說：「總之都係工作啫，大家都好專業，雖然咁多人睇住，但大家都好入戲，靚靚果然係影后。」嘉良表示拍咀戲時沒有想其他事，只是投入演出配合劇情，導演收貨便可以。問到今次是否最激的一場咀戲？嘉良表示不是，另外劇中還有床上戲，但礙於電視尺度故此不會太激烈。
靚靚中環掟錶
對於靚靚表示塞東西入他胸前袋口很尷尬，嘉良笑言：「男人冇所謂，又唔係放喺佢嗰度。」凌晨時分，靚靚和馬德鐘繼續在中環拍攝，靚靚演出大叫和掟錶戲份，途人見到她即要求合照，她都一一答允。
採訪、攝影：林惠卿、娛樂突發組
