以前跑馬臨近聖誕，有所謂火雞馬，但隨着賭波大盛博彩選擇多咗，波馬皆好者，再無必要在聖誕前的賽馬日即好似今天，只有10場賽事同佢搏命；反而留番一定注碼，喺周六、日近百場比賽，挑選心頭好過節也未遲，今次小弟送給波友嘅「火雞馬」，仍然係至愛嘅英冠雄師雷丁。
大節前最佳選擇
波友會奇怪，近期我完全冇品題另一愛隊列斯聯，主因當然係該隊自射球機器碧福特長唞後，加上隊波生牯仔多欠穩定，所以完全唔敢掂；結果他們亦錄得聯賽3連敗，距離升班線越嚟越遠。不過我不認為佢哋升班絕望，只不過想捧場搵錢，要等佢哋重納正軌先得；尤其係大節臨近，呢類小虎隊更加少掂為妙，費事班𡃁仔玩到腳軟，投注人士卻懵然不知，故今戰作客米爾頓凱恩斯，只宜小注冷敲。
小弟聖誕佳節會緊守崗位，而期間嘅歐洲波主菜之一英冠、荷甲更係我嘅重心投注對象，當大家出外花錢消費，我會勤力多做功課搜集軍情，提供心水，望擁躉嘅使費有着落，自己亦盡早在擂台重返爭霸行列。
昆士柏流浪主場勁
閒話休提，首選上周推介大家「主勝」中正嘅雷丁，今次以「3哥」身份，作客挑戰「2哥」伯明翰獲受讓平/半，雙方實力極近兼踢法比「1哥」狼隊穩陣保守，所以入球「細」可期預見，當然讓球下盤更係首選，射手奇雲杜里近4場聯賽食白果，但雷丁仍錄得全勝，這位射手一旦腳風轉順，雷丁贏埋絕不為奇。
保險注，先選昆士柏流浪打低普雷斯頓，前者漸入佳境主場勁，面對作客奇劣嘅普軍，勿以目前排名睇低一方嘅昆士柏讓波唔抵；再捧荷甲鹿特丹斯巴達與海倫芬入球大細開3.5球，照買入球「大」及周日燕豪芬主場輕取今屆完全唔對辦嘅飛燕諾。
近5場往績：WLLWL
蘋果波神
水準有目共睹，長跟必有着數。