癡看：愛巴多過家

12月6日是九巴70號線行駛最後一天，近300名巴士迷送它最後一程，為其拍遺照，可見香港巴士迷的確不少。瘋狂如郭炳華，更神化地對巴士產生一份擬人化感情，豪擲20萬買四架巴士、開設7間巴士精品專門店，對巴士多過對屋企人，愛巴多過愛家。

記者：蒙為亮
攝影：王文忠、梁細權

狂迷編號：014

姓名：郭炳華（50歲）
年資：45年
職業：巴士模型設計師及模型舖老闆
總花費：約50萬
最珍藏：10歲時攡有的丹拿A型火柴盒巴士玩具，當時售價$0.1，而且是香港製造的。
夢想：與巴士迷搞巴士歷史回顧展。

霸氣十足　巴不得不愛

不難發現身邊總有一兩個巴士迷，我初戀女友、副刊同事、中學同學就是巴士會會友，一提巴士停不了口，由巨龍講到丹拿，再談到歐盟三期，巴士歷史背得滾瓜爛熟，身旁的郭炳華笑言是其中一分子，愛巴士全因它那份霸氣，情況一如弱小女孩愛大肥仔，貪那份不能言喻的安全感，「細個我生得矮，巴士好大架，感覺好威猛，自己讀緊小學三、四年班，屋企唔係好有錢，無得坐校車，每日搭2E返學放學，當年車費幾毫子，由大角嘴去石硤尾都要搭成45分鐘，不過自己好Enjoy遊巴士河，試過遊足一日，我只會坐我最鍾意嗰兩個位，一有人坐咗，我就會企足全程，好怪呵？」我搖頭笑說：「不怪不怪！」
若沒這些堅持，他又怎會由開畫廊轉為開模型舖，再由畫油畫變成畫巴士設計圖呢？「細個最有錢嘅時間一定係二月，因為新年有利是嘛，每年大概有$500，我會狂買巴士仔；平時日子呢，會死慳死抵買價值$0.1一架嘅香港貨，手工當然輸畀英國貨啦，六十至八十年代期間，我已經儲咗超過100部玩具巴士，我應該由當時開始中巴士毒，哈哈。」

■80M，既是巴士路線，也是他舖頭的生招牌。

■封了塵倒後鏡虛虛晃晃，見證滄桑歲月。

■中巴60年代佳牌阿拉伯5型，他只喜歡坐上層這個位置，無位寧願罰企。

玩物壯志　公諸同好

巴士是港人集體回憶一部份，由熱狗到冷氣巴，由售票員到八達通，一切一切都在轉變中，人大了，為節省時間我們乘的士多過乘巴士，問郭炳華會否因為人大了錢多了，就和巴士關係疏遠？「無錯我係少坐咗巴士，但唔等於對巴士嘅熱情減卻，我𠵱家比細路仔嗰陣更瘋狂，經常為設計新巴士模型捱通宵。有次為咗設計一架加LCDMon嘅新巴，我足足花咗三個星期研究，我嘅時間同精力全部放晒喺巴士，關係從來無疏遠過。愛一樣嘢係唔會轉變，只係層次唔同咗之嘛，以前，我享受自我陶醉，巴士係滿足自己嘅兒時玩物，開舖頭，識到好多志同道合的朋友，我鍾意將巴士模型公諸同好，多入貨多設計新款式，獨樂樂不如眾樂樂，有知音會更開心。」
他創業，要由1994年說起，那時他在上環西港城租舖，邊賣他的油畫邊從英國購入巴士模型出售。當時香港的巴士公司並未推出自己的巴士模型，所以他要由英國入貨，但由於英國本土巴士比香港短一些，為令顧客覺得模型逼真，他要把英國入口的金屬巴士模型切開再加長，玩得非常認真。

■大大個展覽櫃，裏面全是他的珍藏。

■郭炳華渴望擁有巴士車隊：「要模仿巴士喺總站泊車，眼要貼近巴士用Eyelevel睇先過癮。」

助養巴士　勞心勞力

除巴士模型外，他還「助養」了好幾架巴士，實行做巴士爸爸。「買一架巴士大概$50,000，不過要架巴士行得走得就一定要大修，人工加零件費起碼要$100,000，再粉飾一下外貌又要幾萬，好似裝修間屋咁，每一樣都係錢，不過有架私人巴士，可以自己一個人遊巴士河，感覺真係好正。」
每月維修費及停車場費要$5,000，他笑言送一架給我，我只有苦笑耍手擰頭。「我自己最鍾意就係呢架1954年嘅丹拿A型車款，係當年行駛九龍路面嘅第一批雙層巴士，呢架巴士足足維修咗十幾萬，𠵱家見佢行得走得好安慰，遲啲載埋你一齊遊巴士吖。」樂此不疲的與別人分享自己所愛，這才是真真正正的狂迷。